واحد الجملة كان تايقولها جدي الله يرحموا “أنت هو المسؤول على حياتك، آ العفريت”
هاذ الجملة عمرني فهمتها منين كنت في الكضاشات ديالي، و في العشرينات فهمتها شيء ما و دابا زدت فهمتها و لكن هاذ المرة بطريقة لا علاقة بلي قبل .. واقيلا ماحدني تانكبر و ماحدني تانتافق مع جدي
الحاجة الأولى لي بدلات ليا حياتي المالية
شي شهورا من بعد ما يالاه خدمت - يامات العز منين ماكانتش لانفلاسيو - كأي واحد يالاه خدم دخلت ليوتوب و فينما كان شي productivty guru و money management guru درت ليه صابوني.
و بديت تانجرب طرق كيف تصرف المال و ذاكشي. المهم جربت ماتيسر من الأبليكاسيونات في Play Store (ماعنديش آيفون آخوتي). آشمنك يا Wallet آشمنك يا Pocket و آشي منك يا Jme3 Floussek W chri darek هادي ماكايناش غير تانضحك .. المهم الخلاصة ماعمرني فت سيمانة متابعة في شي واحدة. علاش؟
Money Money
المغرب دولة كاشية (ماشي فاشية، كاشية) يعني كلشي تايتعامل بالكاش تقريبا. و منين تانقولو الكاش، تانقولو خاصك تمشي تتيري فلوس من البنكة.
المهم الأصدقاء و الصديقات لي تايقراو هاذشي من برا و خاصة الجين زي بلاتي نشرح ليكم. منين تانبغيو نشريو شي حاجة في المغرب تاناخدوا هاديك لاكارط ديال البنكة لي تاتشريو بيها نتوما من لانتيرنيت و تي-بي-آوه و سونكونطاكط و داكشي و تانمشيو ندخلوها في واحد التلفازة في الحيط و تاتخرج لينا الفلوس على شكل وراق، واخا ماشي سونكونطاكط تايخدموا مزيان و تقدر تشري بيهم لي بغيتي.
المهم شداني لهادشي كامل؟ شناهي الحاجة الأولى لي بدلات ليا حياتي؟
U Turn
“ماتبقاش تتيري غير داكشي لي خاصك، و لكن تيري صوم مزيانة لي غاتخليك تتيري غير 2 و 3 تال 4 دالمرات في الشهر” يعني مثلا نتا تاتصرف 4000 درهم كل شهر، في كل مرة تمشي للبنكة تيري 1000 أو 2000."
علاش و كيفاش؟ هاد الطريقة غادي تخلي ديما جيبك عامر و غادي تخليك مهني و لكن الأهم هو غادي تخليك عارف شحال تاتصرف بلا حتى شي آبليكاسيون. يكفي أنك تاتعرف في إينا 1000 وصلتي و غادي تعرف راسك واش غادي مزيان بلا budget alerts بلا مولاي بويه. هادي ستة في الشهر و دخلتي في 1000 الثالثة، را شي حاجة ماشي هي هاديك.
الحاجة الثانية لي بدلات ليا حياتي المالية
ايلا وصلتي لهنا غادي تقول شجاب جدي في الهضرة، بلاتي نقول ليك ..
الحاجة الثانية بسيطة و ساهلة، و هي خديت هاد البزطام لي في الصورة بحال ديال جداتي باش ندير فيه الصرف.
Gramma’s Wallet
الصرف من أكثر الحوايح لي تايبرزطو ايلا كنتي تاتخدم بالكاش. لسببين: الأول هو منين تاتوقف عليه ماتاتلقاهش و الثاني هي منين تايكون عندك تايمرضك.
- أنا: عندك الصرف ديال 100 درهم
- مول الطاكسي: عاد تاتقولها .. منين غانجيب ليك الصرف دابا أنا (و أشياء من هذا القبيل)
- أنا: سمح ليا
- مول طاكسي خشا يدو في جيبو و جبد كاع السوانت لي عندو و مدهم ليا.
- أنا: فين غاندير هاذ الصرف كامل، تفو على نهار
و في عالم موازي تانضرب يدي لجيبي
- أنا: هاك آ الشريف، بسم الله
- مول الطاكسي:
Chayfour Taxi
و في عالم آخر موازي
- أنا: هاك 100 درهم
- مول الطاكسي: هاك كاع الصرف لي عندي
- أنا: الله يرحم ليك الوالدين شكرا .. نهار زين هذا
الحكمة ديال جدي
ايلا وصلتي لهنا غادي تقول شجاب جدي في الهضرة، بلاتي نقول ليك .. هاد المرة دبصح
الصراحة هو أنه القولة ديال جدي هي علاش طالع هاذشي كامل .. ذاكشي ديال الفلوس لي الفوق غير سبة باش نكتب هاذشي.
الصراحة الثانية هي ماشي جدي لي قال “أنت هو المسؤول على حياتك، آ العفريت” و لا على الأقل عمرني سمعتو قالها. هاذي غا جملة جبدتها من راسي و لكن ضروري غادي يكون قالها شي حد قبل و ضروري غادي تكون سمعتيها في شي بلاصة اخرى.
Liar, Liar
منين كانت عندي 18 كنت فاهمها فهم ديال ليزونطخوبخونوغ ديال يوتوب و انستاغرام .. كنت فاهم بلي حياتك أنت لي مسؤول عليها ا صاط و خاصك تنوض تخدم على راسك ا الصاط، و ايلا مانجحتي را نتا السباب ا الساط، فهمتيني ا الساط؟
دابا كبرت، وليت فاهمها بطريقة مختلفة، ربما أعمق و أبسط:
ربما ماشي أنت لي مسؤول على كاع ذاكشي لي تايوقع ليك، و في غالب المرات غير الزهر لي تايديك فين أنت و تايوهمك بلي أنت بالصح لي درتيها و وصلتي لذاكشي لي بغيتي .. و حنا حيت كائنات شوية متعجرفة تانتيقو هاذ القضية ..
و العكس عاوتاني شي مرات الحياة تاتمرمدك و تاتكرفص عليك بطريقة عبثية واخا نتا مادرتي فيها لا بيديك لا برجليك ..
Stop He’s already dead
المهم هو الحياة غادا .. بيك و لا بيك، بيا و لا بلا بيا .. و الحياة “هوك” دايرة و ماعندنا مانديرو ..
و لكن، تايبقى عندنا واحد الشوية ديال الخيار في كيفاش غادي تتفاعلو مع الحياة و أي حاجة وقعات في حد ذاتها ما زوينة ما خايبة، حنا لي تانقررو واش هي هاكا ولا هاكاك.
الكرة الأرضية غاتبقى تدور عجباتك خدمتك و لا ماعجباتكش، و الشتاء غير تفاعلات كيميائية تايوقعوا في الطبقات ديال الجو و واش تاتعتابرها “آآه أحببت مطرا بفنجان قهوتي و قطعة حلوى من يديها” ولا “تفو الشتاء عاوتاني اليوم .. عاوتاني عانفزكّ” بجوجهم غير في ذماغك و في تا شي بلاصة من غير ضماغك.
و الصرف لي دويت عليه قبيلة غير قطع نقدية تاتقدي بيهم غرض، و تقدر تلقى واحد لي تايكرهوا بحال كيفاما كنت و غاتلقى عاود لي فان ديالو بحالي دابا و بحال مالين المخبزات ..
المهم الملخص هو الحياة تاتوقع .. و من بعد حنا تانأولو و تانتفاعلو مع كيفاش تاتوقع و هاذشي هو لي طالع عليه الفيلم ..