قواعد النجاح الأربعون

من نيتك، تاتسناني نهضر على أربعين قاعدة ديال النجاح؟ أصلا واش النجاح عندو قواعد؟ و حتى ايلا كانو غالبا ماغايكونوش عندي .. و ايلا كانو 40 قاعدة باش توصل للنجاح غادي نفضل الفشل، غادي يكون أحسن ليا في هاذ الحالة ..

ايلا مازال مامشيتيش، سمح ليا على الكليك بايت، هاذ المرة غادي نكتب على شي لعيبات لي تايبانو ليا مهمين باش تنجح .. أولا تفشل ماعرت .. المهم تعيش حياة مرتاحة ..

ماتعيشش أكثر من جهدك

هاذ القضية خديتها من عند سفيان في تويتر .. و هاذ القضية من أهم الحاجات لي ممكن تدير في حياتك باش تنجح ولا تفشل .. المهم ايلا درتيها غاتعيش مرتاح فوق السلك ..

واحد النهار كنت شاد الحتيت مع واحد مول الهندية و قال ليا “أهم حاجة في البيع و الشرا ماشي هي شحال تاتدخل و لكن شحال تاتخرج، ايلا مشيت للسوق و شريت الزعبول بالغلا، را صافي راني داخل على الخسارة” .. و هاذ اللعيبة تنطبق على الحياة كاملة ..

الصرف منين تايفوت واحد الحد تايولي إستهلاكية و من بعد تايولي عبودية، تاتولي عبد لمصدر الرزق ديالك، (صالير و لا مداخيل دشركتك و لا أي مدخول) حيت هو لي تايمكنك من الصرف ..

و من جهة أخرى الاستهلاك (الصرف) بلية و بلية خايبة .. و كلما استهلكتي كلما تاتبغي تستهلك أكثر ..

منين تاتكون قادر تعيش بشوية تاتكون حر .. تقدر تدير لي بغيتي في حياتك بواحد القدر كبير من الحرية .. تقدر تحبس كولشي و تمشي تجرب حوايج جداد بلا ماتخاف كيفاش غانعيش ..

مالين الخبز و الزيت (الخبز و الماء حيت الزيت ولا ديال ليبوغجوا)، تانشوفكم .. هاذشي لي كتبت ماتايعنيش التقشف .. الصحة و الراحة و العالئة و غيرهم من الحوايج المهمة، آ صرف آ معلم .. و لكن را الأيفون 13 ديالك باقي خدام علاش بغيتي 17 و أنت ماتاتدير بيه والو .. و ذاك الخبز ديال انستاغرام ديال 40 درهم للخبزة باش زايد على خبز دالزرع ؟

أمثلة حقيقية

• الكريدي عالبدية .. أوهو ..
• تزاد الدخل ديالك يعني تزاد المصروف ديالك .. أوهو ..
• الأيفون اللخر ديما .. أوهو ..
• الحوايج غاليين على ود باش يشوفوك الناس .. أوهو ..
• تورط راسك في شي كذبة حول المستوى الاجتماعي ديالك .. أوهو ..
• تبقى تابع الانستغرام و الهايب .. أوهو .. …

صرف على التجارب ماشي على الأشياء

هاذ النقطة تاتشبه النقطة لي فاتت شوية ..

تخيل حياتك بحال شي بيت، الأشياء تاتعمر بيهم داك البيت .. و لكن التجارب تاتوسع بيهم البيت ..

شكون لي أحسن، تتقهوى مع واحد دار العالم، و لا واحد عندو شي طوموبيل مزيانة؟ المهم أنت دبر راسك، أنا غادي نتقهوى مع مول الطوموبيل هههه ايلا عندو طوموبيل مزيانة را غايكون مدوز ..

غير تانضحك، غانتقهوى معاهم بجوج .. غير هو الفكرة هي أنك منين تاتدوز بزاف ديال الحاجات تاتولي القيمة ديالك فيك، تاتولي أي حاجة دازت قدامك تاتعرف توزنها و تقارنها مع التجارب ديالك، و تاتولي انسان زوين و مثير للإهتمام .. أما الأشياء بوحدهم ماتايزيدوك والو ايلا كنتي محشر من اﻷول..

أمثلة حقيقية

• قوة القش في الدار، واخا يكون زوين .. أوهو ..
• تملك حاجات مامحتاجهمش .. أوهو ..
• الأيفون اللخر ديما .. أوهو ..
• تجرب تجارب غير مريحة ليك بحال تتقهوى في بلاصة ماشي مني مستواك .. أيييييه
• تلاقى مع ناس جداد و تولهم على حياتهم و تسمع .. أيييييه ..

راينج ..

هاذي عاوتاني تاتجي من النقطة لي قبل ..

التجارب كيفما قلنا تايكبرو البيت ديالك و تايوسعو الآفاق ديالك .. و لكن ماشي أي تجارب .. ايلا تاتمشي تقوى كل ويكاند في نفس القهوة في عين الذياب، و لا تاتمشي تعيش الحياة في شهر 8 في الشمال و لا في سبانية و لا اليونان .. را الآفاق ديالك ماعندهم فين يوساعو ..

كول طايبو هاري، و تعشى في الريسطورات الغاليين و سافر لبلايص محشرين و عوم في الواد و سير لمهراجان دالسماع و المديح و دخل لمتحف ديال الفنون التشكيلية و سير كول الشواء في السوق و ركب في الكار و سير في بيزنيس كلاص (ايلا قدرتي عليها 😭) و سمع للوايواي و تفرج في أفلام طارانتينو و حضر للأوركيسترا الفيهارمونية المغربية و تفرج في مي نعيمة و ريح مع الناس الكبار و خدم في شركات كبار و دوي مع الملحدين و تناقش مع السلفيين و و و و و و

هاذشي ايلا درتيه تايولي عندك الراينج هههه .. أولا تايوليو الآفاق ديال وااااسعين، تاتولي تفهم الحياة بطريقة أشمل و أبسط، و تاتولي تحس بالناس و تاتفهم علاش تايديرو شنو تايديرو و تايقولو شنو تايقولو ..

و أهم حاجة هي تاتولي ميسي! تاتولي تعيش فينما كان و تاتخرج راسك في كّاع البلايص و تماركي و تعطي آسيست ..

الحمد لله، مع شوية ديال التجربة و بزاف ديال الزهر مابقات تاتضهشرني حتى حاجة، تاندخل لحي شعبي تانحس براسي تم تانمشي لشي دوار في أقصى البلايص تانحس براسي تم و تاندخل لأرقى البلايص تانحس براسي تم عاوتاني (الصراحة شي مرات تانتضهشر و لكن ماشي بزاف هههههه) ..

نقدر نحط براد ب7 الدراهم في الصباح و في نفس النهار في العشية نمشي لبلاصة أخرى ننعشى و نحط نفس البراد ب x10 تقريبا .. و نكون مرتاح في جميع الحالات ..

هبط التوقعات ديالك

دابا منين تاتصرف أقل و تاتعيش تجارب متنوعة و غنية بقات ليك حاجة واحدة و توصل للنجاح .. و لا الفشل ماعرفتش ..

هاذ الحاجة هي توقعات طااااااايحة .. عمرك ماطلع التوقعات ديالك لا من الناس لا من البلايص لا من المستقبل لا من تاحاجة .. ربما ممكن تدير شوية ديال الاستثناء مع راسك و تطلع لابار مرة مرة .. و لكن ماشي ديما و بطريقة صحية ..

صحابي و عائلتي و الناس لي خدامين معايا و الناس لي في الزنقة .. تانبغيهم و تانموت معاهم و لكن ماتانتوقع حتى شي حاجة منهم بالمقابل .. أكيد ايلا شي حد لي نيتو خايبة و تايولي طفلي تانعيق بيه بالزربة (حيت عندي الراينج ههه) و تانعطيه التيقار و لكن مع الناس العاديين و الزوينين مهما صدر منهم عمرني غادي نتحبط، يقدر يشدني الحزن و لا نتعصب و لكن ماغاديش نتحبط، حيت ماتانتسنى والو منهم مهما عطيت ..

و هاذشي ايلا طبقتيه مع أي حاجة الحياة تاتسهال، نقدر نمشي لمدينة بعيدة فيها غير الصهد و العجاج و غادي نريح نتقوى و نوصل لقمة النشوة و الفرحة غير بشي براد و صوت الناس تايناقشوا مواضيع الحياة في الباكغراوند ..

و هكذا دواليك، ايلا كنت ناعس مزيان و واكل مزيان .. را تاحاجة ما غاتبرزطني حيت أصلا توقعاتي متذنية و ممردة في الأرض كاع ..

الخلاصة

العالم ديالنا اليوم ولا صعيب شوية خاصة مع قوة الجري و التوجهات الاستهلاكية، و واخا تعيا ماتحضي ضروري غاتلقى راسك مجرور لشي قنت .. الحل باش تتفادى هاذشي واخا غير شوية هو تبقى مينيمالست الماكسيموم لي تقدر و تكبر آفاقك بالتجارب الجداد و ماتخافش من الحوايج الجداد .. موت واحدة لي كاينة و مولاها ربي ..