السياحة المستياحة

مؤخرا تاندوي مع واحد الصديق و عاودت ليه على واحد النوع ديال التسافيرات تايعجبني نديرهم و قال ليا مازال هاذ البلان ماعندوش سمية خاصك تدير ليهم شي سمية ..

القصة من الأول

واحد نهار السبت في كازا نعست معطل بزاف .. الأحد فقت تال شي الواحدة ولا الجوج .. خرجت للشارع الرئيسي، شيرت لطاكسي .. الأول لي حبس مشيت معاه ..

• مول الطاكسي: فين غادي ؟
• أنا: أنت فين غادي؟
• مول الطاكسي: الساحة
• أنا: حتى أنا غادي للساحة

وصلت للساحة .. طلعت عند كزوم ضربت الطون و كملت لشارع محمد السادس .. وقفت شوية تانفكر في شنو غاندير .. و فجأة وقف واحد الطاكسي قدامي ..

• مول الطاكسي: غادي ؟
• أنا: آآه
• مول الطاكسي: فين غادي ؟
• أنا: أنت فين غادي؟
• مول الطاكسي: مديونة
• أنا: حتى أنا غادي لمديونة

هي هاذيك وصلنا لمديونة .. نزلت في آخر محطة طبعا حيت ماتانعرف على المدينة والو ..هي هاذيك، بدأت االرحلة ديالي في هاذ المدينة الجديدة لي ماتانعرف عليها حتى حاجة ..

بديت الدوران في الزناقي ديال المدينة و تانكتشف العمارة كيفاش دايرة و الفرق بين الأحياء و كانتمعن في الوجوه ديال الناس و تانتبع التصرفات ديالهم .. و مرة تانقاطع راسي بتقليبة في التيليفون .. جبدت غوغل و قلبت على مديونة .. إكتشفت بزاف ديال الحاجات لي عمرني كنت تانعرفهم عليها بحال أن المنطقة عموما كانت مركز مهم لشي قبائل مهمة من الشاوية و لي تسماو عليهم أحياء في كازا (بحال أولاد مومن، الهراويين، و المعاريف…)و أن البلاصة الحالية ولات أكثر أهمية من بعد بناء واحدة من القصبات الإسماعيلية فيها (قصبة مديونة) ..

قلبت شوية في مابس على القصبة و لكن مالقيتهاش .. و سولت بعض الناس عليها و لكن حتى واحد ماعرف الموقع ديالها .. ربما اندثرت و مابقاتش كاينة .. بالإضافة لهاذشي سولت بعض الناس على الحوايج سبيسيال لي في المديونة و الإجابات كانت بين الإستغراب ههه و بين الناس لي أشارو لي للسوق لي ماتيعمرش النهار لي مشيت فيه ..

من بعد ما ساليت الجولة التفقدية قصدت مخبزة خديت حليوات و بقيت غادي تانقلب على القهوة المثالية حتى واحد في القنت ديال المدينة مخرجين الكراسا على برا و عندهم شجيرات و خصة .. و ريحت عندهم ..

و أنا تانستمتع بأتاي و الحليوات لي خديت.. جبدت البي سي، كتبت أو خدمت شوية ماعقلتش مزيان ..

سالا النهار و جيت نرجع .. لقيت الطوبيس سالا (حسب غوغل مابس) و الطاكسيات ماعندهمش البلايص .. هزيت حوايجي و أجلت الحل ديال هاذ المشكل لمن بعد .. مشيت حطيت واحط الطبسيل ديال الكفتة مشوية و استمتعت بالغروب ..

من بعد ما شبعات الكرش رجعت للطاكسيات .. و لحسن الحظ لقيت غوغل مابس غير كذاب و الطوبيس الشطابة (الطوبيت الأخير) باقي عاذ جا .. ركبت و رجعت في حالي لكازا في واحدة من أحسن أمجنن و أعبث ركبة في الطوبيس في حياتي .. و لكن هاذي قصة أخرى لمرة أخرى ..

السياحة المستياحة

من بعد ماصدقات هاذ الرحلة .. ولات واحدة من أجمل التسافيرات لي تايعجبني ندير .. هوما هاذ التسافيرات: ولات من الهواياات ديالي نمشي ندوز نهار أو يومين أو أكثر ولا غير نمشي نقيّل في مدن أو فيلاجات لي حتى واحد ما تايمشي ليهم باش يدير السياحة ..

هاذ اللعيبة منين كتاشفت بلي نقدر نديرها السلوكة ديال ضماغي تبدلو .. السياحة ماشي غير الطبيعة و المدن التاريخية صافي .. المدن و الفيلاجات الصغار أو المدن لي كبيرة نسبيا و “مافيها مايدار” .. بشوية ديال الفضول غادي تلقى فيها بزاف ديال القصص مخبية في الزناقي و الدروبة .. بزاف ديال التجارب و الكوانات الفريدة .. و أهم حاجة فيها بزاف ديال الناس الزوينين لي ممكن تهضر معاهم و تشد معاهم الستون و تخلق معاهم ذكريات زوينين (أو خايبين هاراوكان) ..

من هنا بدات الرحلة ديالي السياحية المستياحية .. نهار تلقاني تاندور في فاس البالي تانستمتع بالتاريخ و العمران الفريد و نهار آخر في المدينة الجديدة تانقلب على أحسن قهوة للخدمة و نهار آخر في صفرو تانجرب المعقودة الصفريوية و موراها في بولمان تاندور في السوق الأسبوعي و من بعد في ميسور تانضرب الرايب عند أحسن مول المحلبة و من بعد في معرض صغيور ديال الكتب في غرسيف و غير نهار من بعد كاندور في الحسيمة في فصل الشتاء تانقلب على أحسن بيصارة و سردين مشوي ..

و في عالم آخر تانقلب على البني القديم لي بقى من يامات الإستعمار في القنيطرة و تاندرب الشواء في سوق الأربعاء الغرب و حاط قهوة حليب تانتسنى الغروب في بلقصيري ..

و في عالم آخر تاناقش أنواع الحوالة مع فلاح في بوعرفة و تانسول شخص تلاقيت معاه في طاطا على أنواع الطروسبورات في المدينة .. أو مقهوي مع راجل سبعيني في عين بني مطهر .. و لا تانتفرج في ماتش ديال الكورة في ملعب القرب في أيت ملول .. و لا كاع محزم و تانلعب كورة مع ناس ماتانعرفهمش في خنيفرة ..

الجمال و الأهمية و “كاين مايدار” جزء كبير منهم ماكاينش في البلايص بحد ذاتهم و لكن كاين في عينينا و عقولنا ..

الدور ديال كازا في هاذشي كامل

2 دالحاجات لي بدلو ليا النظرة ديالي للحياة بواحد الدرجة كبيرة هوها السفر و الدار البيضاء ..

الدار البيضاء علماتني واحد الحاجة مهمة غانسميها “خاصك تجْري مع الحاجة و تعيش معاها و هاذشي بلا ماتخليها تجرك” .. منين يالاه جيت لكازا .. غير تانحط رجلي في كازا بور تاتجرني المدينة لعندها و تاندخل في الريتم ديالها و تانبدأ نجري نجري .. بلا مانبغي و بلا مانعرف علاش ..

من بعد سنوات تعلمت بلي ماشي بالضرورة نجري .. و ايلا ماكنتش محتاج نجري ممكن نبطئ الريتم و نركز مع المحيط ديالي و تما غادي نبدأ نشوف شي حاجات عمرني كنت تانشوفهم قبل .. واخا ديما كانو تما ..

و هنا بديت تانكتشف بلي كازا بالحجم لي هي فيه هازا واحد الكمية ديال الجمال و التسطية و الإثارة لي عمرني كنت تانتصورهم .. وليت مستحيل نخرج و نرجع بلا شي ذكرى جميلة أو قصة مثيرة تبقى في بالي .. و وليت كل مرة تانخرج ندور في بلاصة جديدة في المدينة و نكتشف بلايص جداد و نتلاقى ناس جداد ..

من بعد مدة ديال التسطية و الإنبهار .. نقلت التجربة لمدينتي سلا و قررت نبدأ نمشي لأحياء جداد (لي كان تايبان ليا غير مهمة) و انبهرت بشحال ديال الجمال و التفاصيل و الحوايج في شكل مخبياهم سلا حتى هي ..

و هنا وليت تانآمن بلي أي بلاصة فيها الجمال و أي بلاصة ممكن تكون مهمة و مثيرة ايلا كان عندك الفضول الكافي ..

أهم 2 حوايج

2 حوايج لي تانعاودهم كل مرة تانمشي لشي بلاصة جديدة و خاصة هاذ البلايص:

اليحث العلمي

قبل ماتانمشي لأي بلاصة جديدة تانجبد غوغل و تانبدأ نقلب على المدينة .. شي مرات تانكتفي غير بويكيبيديا و شي مرات تاندوز لكتب و مقالات على المدينة .. بالإضافة لسوشل ميديا لي كاتنفع بزاف خاصة بالنسبة للكوانات ..

لي عندو فمو مايتلفش

دائما سول الناس .. شي مرات من أجل المعلومة و شي مرات غير باش تشد الستون .. الأسئلة للناس تايخليوك تعرف حوايج جداد على المدينة و تعرف فين تمشي و فين ماتمشيش و حتى تعرف الناس ديال المدينة كيفاش دايرين ..

هاذ البلان ديال الأسئلة يقدر شي مرات يكون مضحك أو يبدأ ليك شي موقف زوين خاصة منين تاتسول على مايدار في المدينة:

• أنا: عافاك نسولك .. شنو الحاجات لي نقدر نشوف في مدينتك
• شخص عشوائي: نعم!؟ (مستغربا) .. ماعرفتش .. واش تاتسول على شي حد؟ واش بغيتي تاكل؟
• أنا: لا لا .. شي حاجة لي سبيسيال في المدينة .. شي قهوة أسطورية، أحسن مول المعقودة بالنسبة ليك .. فين ممكن ناكل الشواء .. فين تايعجبك تمشي في وقت الفراغ …
• شخص عشوائي: واخا .. آجي نوريك ….

نصائح عامة

• ممكن ايلا بانت ليك المدينة فيها مايدار .. تقدر تشوف شي شخص مريّح ماتايدير والو و باينة فيه ولد المدينة قح .. جبد معاه الهضرة و دبر عليه يخدم معاك مرشد و يوريك المدينة بعين ولد المدينة .. تقدر تسولو على التاريخ ديالو مع المدينة، فين كان كايلعب في الصغر، الماكلة لي تاتعجبوا و ما إلى ذلك ..
• القهيوات مهمين .. قلب على قهيوات زوينين و شد الستون .. تما تاتسمع ناس المكان و تقدر حتى تهضر معاهم، و تسولهم ..
• منين تبغي تسول شي حد على شي بلاصة .. دائما عطيه آفيرماسيون(تأكيد) مع السؤال .. مثلا بلاصة ماتسول “واش كاين شي مول المعقودة مزيان؟” سول “قالو لينا بلي كاين واحد مول المعقودة مزيان هنا، فين كاين؟” .. هنا تاتحطوا في مأزق فين خاصو يأكد أو ينفي هضرتك ههه ..
• قبل ماتمشي سول على الترونسبور ديال الرجعة و من الأحسن ماتسولش الكورتي ديال الطاكسي أو الكار .. و المباتة قلب في مابس على النماري و عيط سول قبل ماتمشي (ماشي بالضرورة تسول مول لوطيل) أي نمرة لقيتيه عيط عليها و سولهم واش كاين فين نبات ..
• البلايص الصغار في المغرب تايكونو مأمنين و لكن الواحد يحضي راسو ..

خلاصة

السياحة ماشي غير في الطبيعة و البحر و المدن التاريخية .. السياحة ممكن تديرها في أي بلاصة بما فيهم مدينتك لي ربما أقل مدينة تاتدير فيها السياحة ..