ماتش ناضي من عند وهبي .. شوط أول مزيان .. تغييرات مزيانين .. الاحتياطيين متوسطين جدا .. عموما ماتش غادي يعاوننا نطلعوا أكثر في الثقة و نكبروا في هاذ البطولة .. هاذو تقييمات ديالي على اللعابة:

بونو

دار ماتش متوسط .. جبد شي كرات، شي واحدة لي كانت خطيرة و عتقنا من بيت بسبب غلط ديال ديوب .. برجليه كان ماشي طوب .. فزع بزاف ديال الكرات و شارك في الخطأ ديال لقطة البيت .. و لكن ماكانش أصلا خاص يلعب هاذ الكم كامل ديال الكرات .. و السبب هو ديوب ..

ديوب

ديوب كان حتى هو متوسط .. دار ماتش مقبول ضد إيغور .. و لكن ماغطاش مزيان على فينيسيوس في لقطة البيت (واخا ماتايتحملش المسؤولية) .. المشكل الكبير كان منين كرة كانت عندنا .. كان كارثة في تخراج الكرة .. و حتى البرازيل كانو تايوجهو الضغط لجهتو .. بان مرعود .. خاصة أنه أصلا ماتايعرفش يخرج كرة مزيان .. كان غايقتلنا في بيت ..

شادي رياض

دار الماتش لي كان خاصو يدير .. دفاعيا خرج الماتش ديالو .. دار جبهة زوينة مع مزراوي .. و دار زيرو غلط في تخراج الكرة ..

حكيمي

حكيمي معضلة .. لحد الساعة عمرني اقتنعت بالنسخة ديال حكيمي ديال المغرب .. ربما حيت كان فينيسيوس معاه اليوم .. و لكن حتى دفاعيا عندو جزء كبير في مسؤولية البيت .. ماكان لا هو لا دياز راجعين في اللقطة دالبيت .. و هجوميا كان متوسط .. دار شي جريات مزيانين اليوم منهم جرية البيت .. و لكن تايبقى تايبان ماشي حكيمي ديال بي إس جي .. حاجة أخيرة هي ماعرفتش علاش تايلعب الكورنيرات ..

مزراوي

في نظري مزراوي هو أحسن لعاب داز في المنتخب ايلا جينا نحسبو عدد الدقائق لي لعب مقابل ذاكشي لي عطى .. و هو أذكى لعاب عندنا .. اليوم كان رجل المبارات مع بوعدي .. دفاعيا دار رافينيا في جيبو الماتش كامل و هجوميا كان تايبدا المرتدات بأحسن طريقة .. و تايعاون بزاف في البناء .. تحفة هاذ السيد الله يحفظو ..

بوعدي

عمر داز عندنا شي لعاب وسط ميدان بهاذ الجودة في تاريخنا .. دار ماتش أسطوري من يامات زيدان د 2006 .. تايلعب بفرشيطة و الموس .. تايلعب بالكوستيم ..

العيناوي

الجندي المجهول .. من أحسن اللعابة ديال المنتخب .. منين جا ماتاينزلش على 7/10 .. ديما مزيان .. و في هاذ الماتش كان أسطوري دفاعيا و هجوميا .. رجليه مصلوحة و الوحيد لي تايتير مزيان (تايتير أصلا) .. شارك في الغلط دالبيت و لكن دار خدمة كبيرة في التغطية ديال حكيمي و مزراوي شي مرات .. و من الأول حتى الأخير ماقصرش ..

أوناحي

النحلة غادي لور لور .. بالنسبة ليا أوناحي واحد من أحسن اللاعبين الرقايقية لي في هاذ المنتخب و ربما من شحال هاذي .. تايجيني المشكل ديال عقلية .. عقلية ديال ولاد الشعب .. تانشوف فيه راسي .. تايجيني أوناحي عاطفي (عاطفة ديال ولد الشعب) .. أوناحي تانحس بيه باغي يكون هو البطل القومي ديالنا .. باغي يهزنا على كتافو و يكون النجم ديالنا .. تايبان ليا ذاكشي علاش ديما أوناحي تايكون طوب في البلايص الصغار فين اللعابة لي دايرين بيه متوسطين (بحال أمرابط و أملاح في كأس العالم 2022) .. دابا وسط الميدان ولاو فيه لعابة كبار بزاف و كوايرية .. خاص أوناحي يلعب و يدير الدور ديالو في التيران و يدخل لراسو الفكرة ديال أنه مايهزناش على ظهرو .. اليوم تقل كرة بزاف .. ما عاونش بزاف في الضغط و دارش كرات مزيانين ..

الخنوس

جوهرة هاذ الوليد .. من أحب اللعابة دالمنتخب إلى قلبي .. اليوم ماغش في حتى كرة .. الماتش كامل و هو تايجري .. قطع بزاف دالكرات و بدأ بزاف ديال التحولات .. لاعب رائع و متواضع .. من الجنود المجهولين ديال المنتخب ..

دياز

دياز دار باس خيالي في البيت .. من غير هاذشي شد كورة بزاف و في مرات دار قرارات خاطئة .. و مارجعش بزاف .. و في الأخير عيا، بدا غير تايجر رجليه .. ماتش 6 أو 7 على 10 .. ممكن يدير أحسن ..

الصيباري

لاعب زوين .. واخا ماتايبانش .. تايدير مجهود كبير بزاف .. و الفينيسيو في البيت واعرة بزاف ..

التغييرات

المرابط دار دخلة متوسطة جدا و لكن ماشي خايبة و الطالبي كان عيان باينة ماواجدش .. الرحيمي دار دخلة مابيهاش و لكن ماكانش الوقت كافي .. أنس صلاح الدين دار ماتش كوريكط و مابانش فرق شاسع بينو و بين الحاج إلا في كرة واحدة .. أخيرا كاين أمايموني لي دار دخلة مزيانة، دار بزاف ديال المجهود .. قطع شي كرات و دار شي محاولات ديال المراوغة و دار تيرة أو جوج .. ربما الخيار الأول في الجنب من بعد براهيم و الطالبي ..

أخيرا هاذ المشروع ديال وهبي تايبان عندو بوادر مزيانين و مع الوقت ايلا بقينا غادين في مسار تصاعدي بحال هذا .. و كملنا استقطاب لعابة جداد .. غادي ندصلو للكان الجاية بفريق رهيب .. و لكأس العالم الجاي بمرشح كبير لللقب .. هاذشي من جهة و من جهة أخرى وليد الركراكي تايبقى أهم إنسان في تاريخ الكرة المغربية .. بفريق متوسط قدر يوصل لنصف النهاية ديال كأس العالم و كون ما ذاك الإنجاز ما كناش غانشوفو لعابة بحال بوعدي و العيناوي و براهيم و غيرهم ..