أنا دابا مريح في واحد القهيوة صغيورة و جميلة في تازة تانتسنى قهيوة نورمال و الميتينݣ دالصباح .. القهوة جات .. في العادة ماتانشربش القهوة و لكن هاذي تانحس بيها بحال ايلا تمرد على الوضع القائم ..

بشوية بشوية .. هاذي هي القاعدة الجديدة بان ليا .. واخا أنا إنسان دائما تايفونطازمي على الحياة البطيئة الرتيبة .. دائما ماتانلقى راسي تانجري و مزروب و بزاف ديال المرات بالي مشغول تقريبا بوالو و بزاف دالمرات بالي مقسوم على بزاف دالحاجة لي ماشي مهمة ..

الريتم هنا بطيء .. أنا مريح في القنت، على ليسر ديالي المنظر ديال الجبل مخضّر و قدامي نورمال .. دابا داز واحد السيد غالبا من مالين المكان، هز شي حاجة دالماكلة و عطاها للمشة باش تفطر .. البقية مازال مابداوش .. مازال النهار طويل و كل حاجة تاتجي في وقتها .. و دابا وقت قهوة الصباح ..

في هاذ الرحلة ماعارفش شنو غايطرا الصراحة .. ماعارفش راسي فين غانمشي و لا معامن غانتلاقى و لا وقتاش غانرجع .. و لكن عندي توجه أو بالأحرى شي حوايج لي باغي نديرهم ..

باغي نفطر بشوية و على خاطري .. و باغي نهز التيليفون أقل مدة ممكنة في النهار و حتى ايلا هزيتو غادي يكون باش نكتب ..

شريت كتاب باش نجيبو معايا و لكن للأسف ماكانش ممكن للحجم ديالو الكبير لي غادي يعنكشني مع الباكباك الصغير و الوحيد لي ديت معايا .. و لكن كومبونسيت بالكيندل .. عندي شي بركة ديال الكتب لي بغيت نقراهم و شي بركة أخرى اعتباطية ..

باغي نبدأ نقرأ .. نقرأ شحال ما قدرت .. الوقت لي ضماغي يسيفط لي الإشارة باش نشوف تويتر و لا لينكظين بغيت يدي تمشي للكيندل ..

و باغي نرجع نحس بالإحساس بالملل و الفراغ ..

حيدت انستغرام .. الريلز ديال الضحك و التفاهة بلية و الحاجة الوحيدة لي كانت زوينة فيه .. واخا هاكاك عدفتو، مابقيتش تانقدر على الستوريات و الريلزات الجديين فين كلشي تايحاول يقول رأيو أو تايبين بلي راه كاين و موجود أو تايعرف يدير شي حاجة .. حتى أنا مدان في هاذ القضية .. و بزاف دالمرات حتى السطويات دياولي تايجيوني كرينج و ماتانقدرش نشوف فيهم ..

تويتر حيدتو من التيليفون .. تويتر ولا تايعصبني .. بزاف ديال الآراء و بزاف ديال الغوات و التݣمݣيم .. بلوكيتو من التيليفون و باقي في البيسي و غالبا غادي نزير معاه باش نقطعوا حتى هو .. في الاستقبال طلع ليا في صحتي و الإرسال عوضتو بواحد السيت آخر لي تانقيد فيه الأفكار السريعة قبل مايطيرو .. السبب علاش ماحيدتوش هي أنه تايتمسح بعد 30 يوم ايلا ديزاكتيفيتو و مابغيتش نخسر الكونتنت كامل لي حطيت و الناس لي عندي في الكونط ..

لينكدين خلاص .. قمة الكرينج .. شي مرات تايجيب ليا التقية .. هاد الساعة خليتو في البيسي فقط على نفس القصة مع تويتر ..

باغي نبدأ ناكل بشوية .. بلا مانسمع لوالو و مانشوف والو .. باغي نقرأ .. قدام فييوز . باغي نتمشى في الطريق و نشوف الناس بلا ماندير والو من غيره ..

أخيرا الخدمة .. باغي نخدم على حاجة واحدة حتى نساليها .. و من بعد ندوز لحاجة أخرى ..

شوية بشوية ..