دابا دخلت للينكدين و بان ليا واحد البوسط تايدراماتيزي واحد القصة وهمية على واحد الكونسيبط وهمي و إذا و كان و ما فتىْ و هي تشدني الردة .. نضت تانجري للطواليط خويت المعدة ديالي .. و تعصبت تعصيبة ما بعدها تعصيبة .. حيت يالاه صايبت و كليت واحد العشيوة مزيانة و دابا كرشي خوات عاوتاني ..

وا لينكدين دايرو أنا غا باش نسفق للوليدات و البنيتات لي تايتخرجوا كل عام و لا الناس لي تايبدلوا الخدمة و مرة مرة تانحط فيه شي حاجة كتبتها على الضومين .. علاش خاصني نشوف واحد تايعطي الدروس الخصوصية في كيفاش تكون واعر بحالو و أصدقاءو الوهمين و لا واحدة تاتعرّف الليدر الحقيقي بقصة دراماتيكية وقعات لصديقتها الوهمية ..

قررت نشرب غير الما هاذ المرة و مشيت لتويتر .. لقيت بنادم تايغوت .. شي باغي الركراكي يرجع، شي تايعاير الجزائر، شي تايتشفى في الديفلوبرز حيت غايعوضهم الإيآي .. بلا مانحس درت يدي على فمي و نضت تانجري للطواليط ..

هاذ المرة غير الماء و الزغاريد و حموضة المعدة لي شفت .. رجعت مسحت الزمر و دخلت ليوتيب كتبت “تفاهة مغربية 2025” .. و من فيديو لفيديو .. نضت طيبت البيض بماطيشة وحطيت براد و دابا تانتفرج في رياكشن على الكلاش بين إلياس المالكي و طوطو و تانحس بالمعدة ديالي تحسنات الحمد لله ..