بنـــــي ملال، كــــــــازا، أزررررو .. حليت عيني المسدودين بالعمش بزز،
- فين حنا ؟ آخر حاجة عقلت عليها هي ديك المرا مدابزة مع مول الكار حيت هرب عليها.
- يوسف، يوسف .. فيق ! فيق !
- نعام ؟
- واش نعسنا ؟ شكون كان حاضي الحوايج ؟
- آآ ؟ آآه آآه خليني ناعس ..
- يالاه نمشيو آ صاحبي را السبعة دالصباح هاذي ..
هزينا حوايجنا و خرجنا من المحطة الطرقية للخنيفرة، يوسف معنق الخيمة لي تقطع ليها الكاش، و أنا مدابز مع الصاك “المهرهر” .. قصدنا أول باتيسري، ضرينا بيصارا و شدينا الطريق نحو المجهول - بغيت نقول زاوية الشيخ.
- عمي، سمحليا نسولك فين جات زاوية الشيخ ؟ الخرجة ديال المدينة منين ؟
الثمنية د الصباح هاذي و مابقاش الوقت، أبواب جهنم قريب تتحل (الصهد ديال شهر ثمنية، مع العشرة) و مازال مالقيناش أوطوسطوب .. طالعين في عقبة.
- والو ناشفة الدعوة آ عمّي، نزيدو شوية و لا نحبسو ..
- غا زيد زيد هاهنا غاديين ..
شوية بشوية، خطوة بخطوة .. و بلا مانحسوا عرفتي شنو وقع ؟ قول، غا قول !! أبواب جهنم بدات تاتحل و قرعة الماء لي عمرنا من الباتيسري خوات، و تمشينا آ عمي، ما بقى فين نرجعوا .. بعاد على خنيفرة بساعة و الصرف ديال الطريق، المدينة مابقاش تاتبان مورانا، غير الخلاء و القيفار .. و مازال مالقيناش شكون غايدينا .. وصلنا للخر ديال النحس ! لاواه لاواه آشمن نحس الله يهديك هههه ..
- آهيا شنو ذاكشي فوق راسك ؟
- شناهو ؟
- ذبان و لاماعرت شناهو هاذاك !!
- هدا هدا !! تانتا كاين فوق راسك، شنو هاذشي ؟
- ذبان ؟
- اللا ماشي ذبان آ صاجبي ناموس !!
- يخ يخ كثير آ صاحبي .. ماشي ناموس، عمرك شتي شي ناموس بحال هاكا ؟؟!!
- ناموس و لا ذبان دابا شغاندير مع هاذ الزمر ؟!!!
هاذي غير 9 ذالصباح .. مازال العاطي يعطي
- شكادير ؟ غادي تحيد حوايجك في الزنقة
- غالخلا شكون شافك ؟
- الطونوبيلات تايدزو آ صاحبي .. تخيل توقف أوطوسطوب و حنا عريانين ههه..
- شوف الجيب الصغير ديال الساك را فيه واحد الريحة الله يحفظك ..
- هاذ الحوايج خاسنا نديروهم في شي ميكة و لا شي بلان يقدرو يكونو هوما السباب ..
أبواب جهنم أخيرا تحالات و الطريق عاد مازال تاتطوال و الماء مابقاش و الناموس باقِ و يتمدد ..
- والو سطيبا آ خاي، ساعتين و حنا تانتمشاو والو
- تا آشمن سطيبا عطيني غا الما ..
من بعد ما مشينا و استرحنا ومشينا واسترحنا و مشينا لقينا واحد الفيرمة طلبنا منهم الماء، شربنا و مشينا تحت واحد الشجرة و تنشرنا.
- شنو دابا نرجعو و لا نكملو ولا شنو
- يخ يخ طاكسي ! شير شير
- سلام آ عمي .. تزيدنا فينما كان
- واخا طلعوا
من واحد الدقائق ديال الصمت من الموت لي كانت فينا .. بدينا الهضرة مع الطاكسي .. و سولناه على المنطقة و سولنا منين جينا
- جابا نتوما جيتو من سلا أوطوسطوب ؟؟
- واييه آ عمي ..
- والواحد خاص يدير احتياط ي يجيب معاه فلوس باش مايتحنسرش.
عيا مايدق علينا و وااااااالو .. تايهضر مع الحجر .. بنادم مكلخ ما تايفهمش 😅😅 .. ذاك عمي الله يعمرها دار، دار فينا واحد البليزير عظيم .. هاذشي لي زوين في السفر المشكودر، تايلاقيك مع ناس و مع des gestes زوينين لي ماتاتنساهمش .. كون خلصناه ماكنتش غادي نتفكرو ❤ عمي صدق ماغادي فين .. و حطنا في وسط الطريق .. في واحد الفيلاج .. غادي نوصف ليك غير كيداير وأنت حكم: الفيلاج جا على الطريق، صحراء قاحلة ماكاينش الخضورة، فيه جانطة معلقها ميكاينيسان في السماء و تاتدير واحد الصوت ثابت منين تاتحرك مع الريح .. بومبة مهجورة و ماكاينش بنادم .. عرفنا النهار مازال ططويل، ضربنا دويرة في الفيلاج، تبعونا الكلاب، شرنا الماء من واحد الدار و جينا قدام الطريق و توسدنا صيكاننا و نعسنااااااااااااا ..
- فيق فيق ! أوتوسطوب !!
الحمد لله سالات و غادي نبداو في Oh c’est mignon".. نوض آوا نوض .. باقا الطناش ماوصلاتش و مازال العاطي يعطي