المهم ايلا كنتي مازال تاتقرا و كان طالع ليك الدم و طايح عليك الضيم و تاتقول ماعندك زهر تفكر:
القصة رقم 1: السنة الثالثة ديالي في لينصا:
دوزت أول امتحان ديالي نهار السبت و رجعت للدار مسخسخ، غير وصلت نعست باش نفيق نوجد داكشي لي باقي .. لغد ليه فقت لقيت الشاشة ديال البي سي مشخشخة، سديت على ليزيات الوسط ..
هبط للكّزا باش نصايبو مالقيتش الشاشة، لقيت واحدة بالزز ب 1000 درهم لي هو الثمن ديال البيسي تقريبا، و هاكاك في سبيل الامتحانات زعمت و مشيت نتيري الفلوس باش نخلص السيد ..
نص ساعة و أنا تانضور في الرباط و ماكاين تا كّيشي خدام .. لقيت واحد مع ديك ال19، خشيت لاكارط و هي تتسرط ليا .. المشكل هو الكّيشي في القلب ديال حسان (بعيييد عليا بزاااف)،
و سخطت، رجعت للكّزا لقيت خونا جرب الشاشة و ماخدماتش.. هزيت بيسيا و رجعت للدار عديت بإكون قديمة ملسقها مع البيسي .. سيمانة ديال سير و أجي ما بين سلا و الرباط و القنيطرة باش نجبد لاكارط و نشوف شي شاشة .. ما كاين لا امتحان لا ستة حمص.
القصة رقم 2: السنة الثالثة الدورة 2 في لينصا:
قبل الامتحانات بشي يامات، حسيت بواحد العياء رهيب، هانية ماكاين والو .. مشيت دوزت النهار الأول، الثاني .. الموووووت آ خوتي ماقدرتش. صافي قررت نمشي لعند الطبيب ..
- فيك بوصفير خاسك ترتاح آ ولدي هاك واحد 10 أيام .. و ايلا مابريتيش رجع نزيدك
- واخا نكمل الامتحانات ؟
- واش نتا مالك مريض آ ولدي ؟ واش باغي تموت ؟
- أوكي
رجعت للقنيطرة، رتاحيت ليا شي بركة، و جمعت القوة ديالي و كملت التدواز .. 20 دقيقة تانسالي الامتحان و تانخرج .. النهار الأخير كان الجمعة عند الأستاذة، و تزاد معايا الزايد، وليت تانحس بالأجل قرّب و غادي نمشي عند الله.
- أستاذة، راني تانموت، و عندي شهادة طبية و كلشي و مايمكنش ندوز في هاذ الحالة.
- غاتدوز
- بليز
- لا
- بليز
- لا
دخلت دوزت، 20 دقيقة ماوصلاتش كنت ساليت و نضت خارج
- مايمكنش تخرج قبل 30 دقيقة
- تانموت
- لا
- بليز
- لا
- بليز
- لا
مهم رجعت نعست في بلاصتي تا جاب الله التيسير و رجع لسلا، شي شهر ماعاودت رجعت للينصا.
القصة رقم 3: السنة الرابعة الدورة 1 في لينصا:
الويكاند لي قبل الامتحانات .. درت ميزاجور للبيسي كولشي غادي مزيان فجأة تاداكشي حبس ..
ماشي مشكل طفيت شعلت كولشي ضاع، دخلت f Live image و chrootit للسيستام، و عييت مانخربق والو ..
درت OS في USB و فورماطيت المرض .. كولشي زوين السيبت كامل مشا في الفورماطاج .. ال/home كنت مامسحتهاش و بديت تاننقي فيها، و كان واحد الفيشيي سميتو /home/iduoad./lib درت ليه rm و مايغاش permission denied عاودت والو و أنا نتكا عليه بsudo rm -rf ..
هنيئا هاذاك لي مسحت ماكانش home/iduoad./lib و لكن lib/ .. شداتني البكية منين شفت هادوك الفشييات so. تايتمسحو .. طفيت الزمر، عاود جربت live os و لكن القضية كانت صعيبة و كان خاصني تآسطالي بزاف ديال الحاجات .. عاودت آنسطاليت كلشي من الزيو و بيان سيغ عرفتي شنو وقع .. الأحد مشا تاهو في الفورماطاج.
كاينين بزاف ديال البلانات آخرين و لكن باراكة هاذو .. من هاذشي كامل أهم حاجة هي كلشي دايز .. هاذشي كامل داز و وليت تانضحك عليه دابا ..
عيش الحياة و ابتسم و ضرب كلشي بركلة. و ماتنساش مرة مرة غير فقد الأمل 😁😁