في طريق بعيدة بين الجبال، في طريق تاتدوّز غير واحد .. في طريق متهالكة ماقادرتش تصمد قدام الطبيعة القاسية .. في طريق تارة مدردة بالحجر و تارة أخرى مسدودة بالثلج .. تاتمشي سفينة برية كبيرة .. سفينة الحب ..
سفينة الحب غالبا ماتكون من صنع ألماني مرسيدس 207 أو حتى أمريكي فورد ترانزيت .. و لكن بطابع مغربي .. من جهتها تاتعرف الجبال و الطرق دالجبل شبر شبر .. و في الجهة المقابلة الطريق تاتعرفها أحق المعرفة .. كيف لا و هوما تايتلاقاو مرات عديدة كل أسبوع و تايعاودو لبعضياتهم على الشتا و الثلج لي طاحو و على السيول لي جات مع الواد لي حمل .. و على الناس لي وحلو منين تسدات الطريق و على الناس لي ماقدرتش على العقبة الواقفة ..
سفينة الحب غالبا ما تاتبدأ الرحلة في الصباح بكري .. تحت شعار ماتخلي حتى حد موراها .. حيت ايلا مالحقتيهاش اليوم غادي يخاصك تتسناها حتى لغذا على أقل تقدير. من بعد تاتبدأ المغامرة باش توصل لأكبر عدد ديال الناس فينما كانو و مهما كانو بعاد ..
دابا 12: في مدرسة صغيرة في واحد الدوار صغير وسط الجبال .. الأستاذة شيماء و التلاميذ ديالها واقفين قدام الباب ديال الداخلية تايتسناو السفينة ديالنا تجيب ليهم قفة كبيرة ديال الخبز من عند الفران ديال الفيلاج باش يدوزو هاذ الأيامات.
مع 12 و 14 دقيقة: سفينة الحب تاتوقف قدام واحد الرجل سبعيني - سّي أحمد - باش تعطيه الدواء ديال السكري لي تاياخد من صيدلية المدينة.
مع 2 و 20 دقيقة: لالة حليمة و بنتها تايتسناو ضرف فيه نتائج الكونكور ديال البنت و شي بركة ديال الفلوس من عند الأب لي خدام في المدينة.
4 و 45 دقيقة: سفينتنا وصلات لوجهتها أخيرا و من بعد مانزلو الناس جات نوبة خالد لي جا باش ياخد خنشة فيها شي بركة ديال التفاح و الزيتون و شي تمرات ديال البلاد جايين من عند الواليدة خصيصا .. و نعيمة لي جات باش تاخد شي فرارج بلديين سيفطاتهم ليها صاحبتها و شريكتها نزهة باش تبيعهم في المدينة هاذ السيمانة ..
وصلات 5: سفينة الحب سالات الفصل الأول ديال المغامرة و تاترتاح باش تبدأ فصل جديد فيه غادي تخدم ناس جداد و غادي يخفف عليهم العزلة شوية.
سفينة الحب أكثر من وسيلة نقل .. سفينة الحب حياة .. بزاف دالناس حياتهم واقفة عليها .. بزاف دالناس هي الرابط الوحيد بينهم و بين العالم .. تحيى سفينة الحياة و يحيى جميع الناس لي عايشين العزلة فينما كانو ..
سنة أمازيغية سعيدة ⵣ
حرر من داخل واحدة من سفن الحب ✌🏾
