هاذشي كتبتو في 2019 و لقيتو غير دابا في المذكرة .. قلت ننشرهم ..
الأفكار لي هنا ماشي كاملة متوافقة مع شنو تاننفكر دابا و القصص لي التحت لا علاقة لها بالحقيقة .. أي تشابه و ذاكشي …
ناس أحسن من ناس
ما كانكره تا واحد، و صعيب نكره شي واحد شي نهار .. و لكن عندي حساسية كبيرة من الناس لي تايسحاب ليهم راسهم أحسن من بقية الناس.
هاذ القضية ولات متفشية فينا بزاف حنا جيل السوشل ميديا. حيت المعلومة ولات متاحة فجأة و بسهولة و بكميات هائلة. و هاذشي خلانا نقدرو نوليو من هاذيك الكائنات المكلخة لي ما عارفة والو، لكائنات راسها عامر بسرعة قياسية.
و مع هاذ التغيير السريع، تاتبقى عندك ذكريات ديال هاذاك أنت ‘المكلخ’ و تايولي تعتابرها عار عليك و كاتكره هاذاك ‘أنت’ على اختلافاتو الكبيرة معاك، و تاتكره القيم ديالو و أي حاجة تاتفكرك بيه و لا تاتخليك تفكر فيه. و بهذا تايتولد عندك واحد الشعور بالفوقية superiority عليه و على لي مكلخين بحالو (عامة الناس) .
و هنا فين تايتولدوا هاذ الناس الله يهديهم. بكثرة ماتايكرهوا راسهم القديم تايفرغوا ذاك الكره على شكل حوار ديال الحقد و الاحتقار تجاه الناس. و تايحطوا راسهم و أفكارهم في مكان عالي فوق منا حنى ‘الناس العاديين’.
العالم ديالنا اليوم تايشع بكم هائل من المعلومات، في كل دقيقة و كل ثانية.
و في نظرية المعلومات (أو غير بديهيا) ، كمية المعلومات تاتناسب طردا مع الفوضى (التعقيد و قلة patterns) للي في النظام لي تايعطينا هاذ المعلومات.
مثلا ايلا قلت ليك عقل على 55555 و 25685.. ايناهو لي غادي تعقل عليه أسرع؟ أكيد الأول حيت فيه معلومات أقل (مرتب و فيه patterns و مامعقدش) . هاذشي هو العماد ديال بزاف ديال المجالات في هندسة الاعلاميات منهم compression و Random generation و غيرهم بزاف (خان اكاديمي)
المهم من هاذشي، تايبان لينا أن العالم معقد بزاف (حيت فبه بزاف ديال المعلومات) و مازايد غير تايتعقد. و هاذشي تايعني حاجة واحدة (لي قاسية شي شوية على بزاف ديال الناس) لي هي مايمكنش لينا نفهموا العالم و مايمكنش لينا نمتلكوا الحقيقة مهما حاولنا.
را كونك حذاثي و تاتآمن بآخر ما خرج في القيم الإنسانية لا يجعل منك انسانا أكثر من أي واحد في هاذ الكرة الأرضية.
و شحالما قريتي دالكتوبة و شفتي من الفيديوهات و الأفلام، را بحالك بحال عباد الله، ما زايد عليهم بتا غرام ديال الانسانية.
أيوب و رانية يحيى و الزواج؟
أيوب
أنا؟! سميتي أيوب عندي ٢٦ سنة خدام هنا في كازا في واحد سوسيتي… آآآ؟! السالير؟ 6500 ادرهم… الله يجعل الباراكة آخويا.
منين شديت الباك درت ايكول. وو من بعد عام ديال الشوماج هانا آخاي مع هاد الناس. تانتقالوا مع هاد الناس هأهأهأهأ..
الحلم ديالي آ خويا.. الحلم ديالي نرجع ليامات العز. يامات الباك.. يامات الحرف.. إييييه ياليام،كان لي تحط قدامنا تانزلوا عليه. ضعنا آخويا ضعنا.
نتزوج ؟! لا آخويا! مازال صغير أ خويا شبغيتي عندي؟ هأهأهأهأهأ.. آهاها آخويا ايلا جاب الله بنت الناس علاش اللا.. دابا تانجمع آخاي نديرو باش نهزوا رجلينا را قهرنا الطرونسبور في هاذ كازا. و أصلا تايقولك الطوموبيل تاتجيب المرأ! كاينة ولا لا هأهأهأهأهأ.
رانية
أنا سميتي رانية، عندي ١٩ عام، تانقرا في fsje.. آآ ماعرفتيهاش ؟ لافاك!! دايرا droit francais و هاد العام ساليت deug علي ربي مايخرجلي تا شي module مامفاليديش. مافيا مانعاود العام على والو.
أنا responsable de communication في bde و العام الجاي ان شاء الله غانترشح باش نشدو.
الحلم ديالي ؟ ماتانآهنش بالأحلام. من بعد الديبلوم غادي ندفع لمباراة المحاماة. بالنسبة لشنو بغيت ندير. بغيت ندور العالم، و بغيت نولي ناشطة حقوقية في ميدان الدفاع على les droits de la femme في المغرب.
الزواج؟ تاتضحك عليا؟؟
يحيى
أنا يحيى، 35 سنة، عندي ٢ وليدات.. آآه كاري هاذ الساعة.. من شحال هاذي باش خرجت من الدار.. راك عارف مع المراة و الواليدة. وعاد دابة الوليدات. الواحد هو لي يخرج يدبر على راسو.. كاري آ خاي. كاري بسطاشرآلف. ماهو دار ماهو بيت. المهم هازنا حنا بربعة.
الخدمة؟! وااا شغانقول ليك.. كنت خدام سيكيريتي بستة و ربعين آلف، و هاذي شهرين باش حبست. قهراتني خدمة الليل. دابا راشهر و انا تانقلب على الخدمة مازال ماجابش الله، تالكرا مازال ماخلصتو. كون ما النساب الله يخلف عليهم كون مالقينا ماناكلو.
ناضي في الماط
شتي نعاود لك آخاي و الله ماتيق بالله. في يامات الباك كنت تانفركَع الورقة، ديما خارج أنا الأول و ماكاين لك غير ١٨ و ١٩ تاتشاير.
ندمت علاش مادرت بريبا أنا آصاحبي.. آآآ،؟! قصة طويلة خاديك. كنت طلع في لاليست ضاطونط الثالثة، وصلوني و لكن مامشتيتش.
كنت قتال في الماطآخويا، واحد المرة في ليكول، واحد البروف ديال التيدي ماكانش عندو معايا، مماكنتش تاندخل عندو هأهأهأهأهأ واحد النهار دخلت ريحت اللور. هو يجي تمرين كَال ليهم شكون لي خدموا. تاواحد ماهز صبعو هأهأهأهأهأ ، تخيل؟!!! قلت لي أوستاذ انا خدمتو. جا طل على الورقة مافهم وااالو هأهأهأهأهأ. كالية هاذشي في شي حاجة ماشي هي هاذيك. و أنا نجهل. قلت ليه ‘بالرب تا صحيح’
البكرة
البكرة؟ كذبة اخترعوها الرجالة باش يخليو البنت كَالسة في الدار تاتسناهم. علاش ديما البنت هي لي خاصها تحافظ على راسها و الدري يدير مابغا. حيت راجل؟!!! تخربيييق.
الحب، ماكاينش. غير ٢ تايتلاقاو تايولفوا بعضياتهم و تايبداو يحلموا.
العلاقات، قلتها لك قبل ماتانآمنش بيهم. مامحتاجاحش شي حد باش نحس براسي و نتيق براسي كمرأة. كانبغي راسي آ سيدي. Je suis en couple avec moi meme هههه
البكرة؟ كيفاش؟ زعما واش عزبة؟ آلا آصاحبي تامالك مريض؟ أنا تكون عندي البنت و تدخل عندي للدار ماشي عزبة نقتلها.
الحب؟ تاتصوروا هادشي آخويا خخخخخ. الحب كاين آخاي يكذب عليك الكذاب.
مولات الدار؟ شغانقول ليك؟ الصراحة كانبغيها.
العلاقات، كان آخويا داكشي في وقيتة الصغر، يامات الطيش دابا صافي درنا وليدات و عفى علينا الله.
الإلحاد
الالحاد هأهأهأهأهأ، كاين آخاي vrai، شحال هوما كانوا عشراني دابا ولاو ملحدين، ماعرفتش آخويا بنادم غادي قاصد جهنم برجليه هأهأهأهأهأ.. آخويا ماعرفناش واش حنا غاندخلو للجنة، آخويا الله يهدينا.
آآره آصاحبي را vrai هاذشي، واحد عشيري خرح لينا النيت ولا تايحط داكشي في فايسبوك.. شنو درت؟ قلتها ليه نيشان آخاي. قتليه هاذشي لي تاتدير فيه ماشي هو هاذاك. آآه في فاسيبوك النيت، كتبلي واحد الميساج طويل، ماقريتوش آخويا مالي على حالتي هأهأهأهأهأ.
قلت ليه الله يهديك.
من تما ماهضرناش، واقيلا حيدني من ليزامي، تسنا نشوف.
الالحاد، لا لا ماكاينش، آشوف، سمعني نقول ليك ماكااينش، تصنّت! تانهضر معاك بالصح هادشي مامنو تا شي حاجة. هانتا دور في الزنقة ايلا لقيتي غا واحد آجي حني ليا وجهي. غاتخربيق داكشي آخويا نقولها لك من عندي.
مدن مغربية
هاذشي كتبتو الأعوام الأخيرة
- القهوة ماتاتفوتش 10 دراهم مهما كانت البلاصة زوينة (دبدو)
- الماكلة بنينة بزاف و رخيصة و كاين بزف ديال الخيارات تختار منهم (اساغن)
- فيها شي متحف أو مركز التعريف بالتراث صغيور و واااااعر (أحسن من المتاحف دالمدن الكبار) (أزيلال).
- المدينة مكاااالمية و ضايرة بيها طبيعة خلابة و ماكاينش بحالها. (بولمان) 1.المدينة عندها تاريخ كبير و لكن مامشهورش بزاف (الريصاني) 1.المدينة فيها مبادرات ناضيين ديال الشباب و الناس دالمدينة عموما (تزنيت) 1.السياحة ديالها معظمها من السياح المغاربة، و أغلبيتهم من أقرب مدينة كبيرة (اموزار الكندر)
- السياح الأجانب ماتايزعموش علها و أغلبيتهم فرنساويين عايقين بالقالب ديالها و تايجيو ليها كل عام. (تافراوت)
- جزء كبير من السياح تايكونو جايين بموطورات أو 4x4 و تايديروها في الطراجي (طاطا)
- الطاكسي كبير(أو ترانزيت) تايضرب مسافات طوال بثمن رخيص (دمنات)
- لوطيلات رخاص و مخبيين و ماكاينينش في booking من غير شي واحدين قلال لي تايكونو خارجين شوية المدينة. تقدر تبات بوحدك في بحال هاذ المدن ب 50 درهم و تقدر تبات ب1000 في قنت مشلخ برا المدينة شوية (أزرو)