الطيب - The Good
ياسين بونو
أحسن لاعب في التاريخ ديال المنتخب .. أحسن لعاب في هاذ كأس العالم و في تاريخنا في كأس العالم .. دائما تايتألق و عمرو تايخدلنا .. و فوق هاذشي كامل إنسان جميل.
ثنائية الدفاع: شادي و عيسى
ثنائية ديال الدفاع مهما كنا خايفين منها مافرطاتش .. ديوب بدأ بدية مهزوزة خاصة في تخراج الكورة و لكن من بعد و خاصة دفاعيا كان مزيان .. و الأجمل في هاذشي هو أنه كان شرس دفاعيا و ربع أغلبية النزالات ديالو و ماقصرش ولا تخادل معانا .. حط ذاكشي لي عندو كامل في حدود المستطاع طبعا ..
في الجهة المقابلة كاين شادي رياض .. دار ماتشات جميلين، بان واحد من أحسن المدافعين المغاربة لي كاينين عندنا في هاذ الفترة .. حتى من القتالية ديالو بانت بزاف في هاذ المونديال، و بان شحال تايلعب للتوني و تايعطي للفرقة .. و أخير الحاجة لي بديهية و ماتحتاجش تتقال هي أنه كوايري و تايخرج كورة مزيان .. الحاجة الوحيدة لي خايبة هي أنه مالعبش جميع الماتشات حيت للأسف تضرب عاوتاني و زاد برهن بلي النظرية لي تاتقول أنه لاعب زجاجي صحيحة ..
الحاج المزراوي
الحاج نصير المزراوي لاعب رائع و مثال لأي لاعب غادي يجي للمنتخب في المستقبل .. منضبط، كوايري، تايتقاتل، ذكي كرويا، ماتايتشكاش، مزيان هجوميا، مزيان دفاعية .. المهم فينما بغيتيه كاين .. و الأهم من هاذشي كامل تايعطينا كل ما عندو، عمرنا حسينا بلي راه تايتداخر الجهد ديالو مع المنتخب .. و هاذ كأس العالم الوحيد مع بونو لي دارو أداء مستقر بين 7 و 10 في جميع الماتشات (ربما ماتش فرنسا ظلماتو التشكيلة و المركز الجديد)
بوادر من ثنائي الوسط
على مدار البطولة من ماتش لماتش بانو بوادر مزيانين هنا و لهيه من ثنائي الوسط (نقدر نزيد حتى المرابط) .. خاصة بدون الكرة .. تقدم كبير مقارنة بشنو كان قبل .. هاذ البوادر ماكافيينش طبعا .. و لكن ايلا استمروا في الخدمة و دار قرارات مزيانين في الإنتقالات نقدرو نضمنو وسط ميدان مزيان لسنوات طويلة ..
سي أوناحي
سي أوناحي بدأ البطولة بطريقة كارثية و ماتش مور ماتش بدأ تايرد النيفو .. و سالا البطولة بطريقة مزيانة و كان الوحيد لي تايحاول ضد فرنسا ..
الخنوس حتى للدور 32
منين شفت النسخة ديال الخنوس في الماتشات الأولين قلت مع راسي: أخيرا كبر هاذ الزمر .. كايجري الماتش كامل و في التيران كامل، تابريسي مزيان، رجلي مصلوحين، و حتى الشخصية و القتالية بانو مختلفين على كنا تانتسناو من الخنوس كلاعب.
الصيباري
الصيباري في هاذ كأس العالم، أثبت أنه يستحق، بلي يقدر يكون هو السوبر ستار ديال المنتخب (و هو ذاكشي لي تانتوهمو أنه غايجي من دياز زعما) .. مور كأس إفريقيا لي ماكانش سيء، الصيباري خرّج لأول مرة ذاكشي لي كان تايدير مع فرقتو .. و بين بلي غادي تايتسلت ببطء لقائمة الكوادر ديال المنتخب ..
تانتمنى يمشي مزيان في البايرن ميونخ، و يزيد يكبر ..
الرحيمي
الرحيمي قصة جميلة .. من أجمل القصص ديال هاذ كأس العالم .. ماكانش ديما مزيان، و لكن تايبقى دار دخلات مزيانين و ماركا و شارك في بزاف ديال الأهداف .. الجميل هو أنه بين بزاف ديال الرغبة و الشخصية لي بين ..
الوليدات الجداد
تانحس بلي الوليدات الجداد، لي دخلو في الماتشات بحال الطالبي و أمايموني و جسيم و حتى المرابط (للي كاملين 21 عام أو أقل) كانت عندهم رغبة كبيرة (ماشي في جميع الماتشات) .. و هاذشي مبشر شوية! كانتمنى يزيدو يلعبوا أكثر مع فراقيهم و مع المنتخبات السنية (U-23) .. متؤكد أنه ايلا خداو قرارات مزيانين في الكاريير ديالهم و لعبوا أكثر و أكثر غادي نربحوا لاعبين مزيانين واخا غير في دكة البدلاء ..
وهبي
وهبي بين على أنه مدرب مزيان .. راسو صغير و تايسمع للفريق ديالو و تايخدم .. كانتمنى الإقصاء مايأثرش على هاذ الطاقم و يزيدو يخدموا
عدم المجازفة في المصابين
من أسوء الحوايج لي كان ممكن يدير وهبي هي يدير بحال الركراكي و يدخل الصيباري أو شادي رياض ضد فرنسا .. كنا غادي نغامروا بلاعبين من الأهم للمستقبل ديال المنتخب .. و ماكان غادي يكون عندهم حتى شي تأثير أصلا ضد فرنسا ..
شكرا أمرابط و الكعبي
من الحوايج الجميلة هي شفنا لعابة لي دارو تاريخ مزيان مع المنتخب، يلعبوا في هاذ المونديال ..
السيء - The Bad
وا الخلعة طلقي مني
شي لعابة بانو مازال ماواجدينش نفسيا .. و مابينوش شخصية كبيرة في أغلب المباريات و خاصة في المباراة الأخيرة .. كاينين لي مازالين صغار في العمر و ماعندهمش خبرة كبيرة و هذا مفهوم و لكن كاينين لي كان المفروض نعولوا عليهم يهزوا المنتخب و لكن شيء ما خدلونا ..
البدلاء
على طول البطولة كان باين الفرق الكبير لي كاين بين الرسميين و البدلاء .. هاذشي ربما راجع للوقت الصغير لي كان عندنا باش نوجدوا فرقة و خاصة من بعد الإنتكاسة ديال الكان من جهة، و من جهة أخرى راجع لأننا مازال ماعندناش قاعدة واسعة و مزيانة منين ممكن نختارو لعابة .. كاين شي بوسطات لي كنا جبنا فيهم أحسن ماكاين و هاكاك بقات الجودة قليلة ..
نقص الفعالية
في الماتشات الأولى كنا بشعين في إنهاء الهجمات .. هاذشي راجع شوية للعابة لي دينا و التشكيلة ديال المدرب .. و ربما ليهم بجوج .. خاصنا أكثر ديال الخدمة على الإنهاء في هاذ السيستام الجديد، و في نفس الوقت نحطو أنظمة بديلة ربما بلعب فيهم مهاجم صريح دور أكبر ..
البشع - The Ugly
الجهة اليمنى
الجهة اليمنى ديالنا كانت بشعة و خاصة بالسميات لي كانو فيها .. حكيمي و براهيم دارو واحد من أسوء الأداءات بالمقارنة بشنو تانتسناو منهم (و خاصة براهيم) .. الأبشع في هاذشي كان هو الترخوين الكبير ديالهم .. براهيم في بزاف ديال اللقطات كان ماتايرجع يغطي على حكيمي .. و هاذ الأخير في بزاف ديال اللحظات مادارش الجرية لي كان خاصو يجيرها ..
الكرات الثابتة
أغرب حاجة في هاذ البطولة هوما الكرات الثابتة .. مادرنا حتى شي كرة ثابتة مقادة .. غير التشيار و التخربيق .. ماعرفتش علاش الحرص على أن حكيمي ديما خاصو يوقف على أي كوفرة و أي كورنر .. المهم كانت طريقة التنفيذ بشعة بزاف ..
الضحكة ديال حكيمي ضد فرنسا
هاذ النقطة على الضحكة ديال حكيمي بحد ذاتها .. ضد فرنسا كنا المنتخب الأضعف .. و كنا تانبانو راضيين بالهزيمة وسط التيران .. هاذشي ماعندوش حل دابا و لكن مع الوقت غادي يخاصنا أكثر و أكثر ديال اللاعبين تايلعبو في مستويات كبار، و لي ماتايشوفوش راشهم أقل من حتى شي منتخب آخر ..
كوناتي و تشواميني لي رسميين في الريال احتياطيين مع المنتخب، في حين حنا النجم ديالنا تايلعب إحتياطي في نفس الفرقة ..
قلة النية
هاذ النجاح ديال المتخب جاب بزاف ديال المشجعين و الجماهير للمنتخب و هاذشي مزيان .. و لكن خلق واحد الموجة رهيبة ديال الإستهلاكية .. قهوة لي كانت تاتدير 10 دراهم ولات 100 و 150 درهم، و التيشرت وصل ل 1000 درهم .. هاذشي بشع و تايضر في الخاطر ..