النظرية لي غادي ندي بيها نوبل

هاذشي كتبتو مور الطناش دالليل .. غا سمح لينا ايلا قريتي شي حاجة ماعجباتكش .. نعوضوها ليك في الكتبة الجاية إن شاء الله

عندي واحد النظرية غادي ندير بيها الدوكتوراه و غادي ناخد بيها نوبل للسلام:

فيزيونوميا و بيولوجيا و أنطروبولوجيا و و و و بنادم مأوبتيميزي باش يهضر أكثر من أنه مأوبتيميزي باش يسمع ..

أنواع الهضرة

الهضرة 3 أنواع:

• الأراء: المرأة تقرأ حدها السادس
• الحقائق: الجلبة ديال كوفيد فيها كونيكسيو *6
• القصص: القصة ديال جدي في الحرب ضد البرطقيز

المتغيرات

هاذ ديال الأنواع ديال الهضرة كل واحد تايرتابط بمتغير واحد مهم تايحددو

الأراء و الحجم

تايتابطوا بالحجم .. كولما كان عندك صغير (العقل و القلب ماتخاف ماتدهش) كلما تايزيدو الأراء ديالك و العكس صحيح .. مثلا عمرك شتي شي عروبي عندو گطعة ديال الغنم و كوري ديال البقر وفدادن ديال الفصة و ثلاثة ديال العيالات تايشارك معك الرأي ديالو في شيحاجة ..

و لا مثلا شي امرأة برلمانية بنت شي تاجر كبير عمرها عطاتك رأيها؟ و لا شي حد خدام تايطلع السوارخ للقمر و لا شي حد رياضي كبير .. واش عمر ميسي عطاك الرأي ديالو؟

غا أنا منين كنت في لافاك و كانت حازقة عليا الوقت و شي رباعة بحالي في اليوتوب لي باقين تانعطيو آراءنا .. كلما كنتي مقموع من الحياة ولا على الأقل تاتحس براسك مفراني تايخصك تخرج أكثر ديال الآراء و حقك هاذاك تمسك بيه بيديك و رجليك ..

الحقائق و السحاب

هاذو تايرتابطو بالسحاب ديال العلم .. كاين الذين يعلمون و الذين لا يعلمون و هاذو بجوج ماتايخرجوش الحقائق بزاف من فمهم .. و كاين لي تايسحاب ليهم يعلمون و هاذو تايطيرو في الحقائق ..

شي واحد عندو دوكتوراه في شي عجب و لا شي حد خدم شي بركة في الشركات و حررها شي آدمين ديال شي گروب في واتساب ديال الخالات و لا حتى شي حد قاري أونتيخريسطوس و شي كتاب غير حياتك ..

القصص و العيشة و المعيشة

هذا مستوى أعلى ديال الهضرة و تايرتابط أساسا بالعيشة و المعيشية .. كلما عشتي كلما تاتجمع في القصص .. و “عشتي” فيها شنو عشتي أنت و شنو عاشو الناس لي تلاقيتي بيهم و الناس لي قريتي ليهم و الناس لي تفرجي ليهم و غيرهم الكثير .. إيلا ماعشتي والو را تاتقول الحقائق و الأراء حتا هوما مزيانين ..

شي حد دوز الحبس و الإجرام و التمشكيل و العجب المعجب عمروا غايعطيك رأيو .. ديما غايعاود ليك حياتو .. واحد سافر العالم و تلاقى مع الناس و تحنسر و بلبلها حتى هو ماعندو حتى شي حقائق مايشارك معاك عندو غا القصص إيلا بغيتيهم ..

و واحد كان تايقرأ من 8 ل 6 و من بعد تايمشي للمراجعة و تايجلس القدام و ماتايحركش الدجاجة على بيضتها تقدر تلقى عندو بزاف دالحقائق على القسوحية ديال الباك ديال 2015 و بزاف ديال الأراء على الأساتذة و على السوايع لي تايدير بالليل ..

شوية دالبراتيك

دابا سالينا الهضرة ندوزو للبراتيك

• واحد حياتو كاملة مواضب على القراية و سهل عليه الله و كلم SVT و دار دوكتوراه في البيولوجي في ألمانيا و تزوج زوجة صالحة عايشين مزيان، مرة مرة تايسافر و لكن ماتيحملش يتلاقى بنادم تايمشي يجور في المتاحف ولا في الطبيعة: جبتيها صحيحة غادي يكون تايطير في الحقائق من بعد القصص و في الأخير الأراء ..

• واحد تايقرأ جغرافيا في لافاك، تايبان ليه بلي النظام التعليمي خاصو يتغير و لكن هو مازال لي S1 مامفاليديش .. بالأضافة لهاذشي تاتبان ليه المرأة ماخاصهاش تخدم حيت ضماغها صغير و تايتشكى من النساء لي غادي يديو ليه الخدمة ديالو و هاذشي كامل حيت عندو صغير (العقل الباطني): عاوتاني صحيح هاذ السيد محمل بالأراء و شي بركة متوسطة ديال الحقائق غالبا عن فيزيونوميا المرأة و القصص الله يجيب

• خالتي حليمة عندها 5 دالولاد رباتهم كاملين في وجود ضعيف ديال الأب، تقاتلات معاهم حتى قراو كاملين و خدموا خدامي مزيانين .. كانت دائما حريصة على الملائمة بين مسؤولية الدار و العائلة و الحاجيات ديالها و تربية الأطفال .. خالتي حليمة كبرات و دابا داخلة في دارت و نشيطة في الگروبات ديال واتساب ديال العائلة: برافو عليك 3 على 3 .. خالتي حليمة عامرة قصص ماتعاود، تعطيك شوية ديال الحقائق ايلا بغيتي (بحال الهيكل ديال سيدنا آدم لي لقاوه و الدلاح لي فيه مواد مسرطنة بسبابها ماتصدرش) في الأراء خالتي مامجهداش بزاف و تقدر تقهرك بالله و علم آ وليدي ..