على بعد شي يامات معدودة على العيد الميلاد التلاثين ديالي .. قررت نكتب شي بركة .. منها شيكبوينت و منها نخوي راسي و منها نحتافل بهاذ الإنجاز لي عمرني كنت تانتخيل راسي نقدر نوصل ليه ..

غانقسم هاذشي على جوح: جزء فيه أفكار و خواطر و حكايات و شي حاجات لي تعلمت في هاذ 30 عام .. و جزء ثاني على البلانات ديال المستقبل (لي ماكايمنش أصلا)

الجزء الخمسطاش

باش تاتحس

على سبيل الضحك و الممازحة بزاف ديال الأصدقاء منين تايعرفوني قربت نفوت 3 دالعقود تايسولوني باس تانحس .. بالصراحة-الصراحة تانحس بالسخفة هههه وااا الموت آعباد الله وا تلاثين عام ماخلات مادوزات عليا .. خاصة أن الله سبحانه عطاني حساسية عالية في الحياة .. تانعيش أي لحظة و تانحس بيها في عظامي و تانرد البال مع أي ديطاي و تانفكر 24/7 .. ضماغي ديما خدام و جوارحي مكونكطيين مع العالم .. و هاذشي تايخليني نحس بكولشي لداخل فيا .. ماعندي لا بارشوك، لا ايرباݣ، لا أمرتيسورات تحميوني من الشوك ..

هاذشي من جهة و من جهة أخرى تانحس بالفخر ههه .. تلاثين عام ماساهلاش .. واقيلا أهم إنجاز عندي هو كملتها أصلا و ثاني أهم إنجاز هو كملتها بأقل الأضرار ..

أخيرا واحد القولة تانقولها دائما و تانحس بلي هي أكثر قولة تاتعبر عليا هي:

هاذشي لي تانعيش دابا في الحياة كامل غير فضل .. راس المال وااا دخلتو شحال هاذي ..

مابقات حتى حاجة تاتبهرني

كيفما قلت قبل .. في هاذ الحياة وا ماخليت مادوزت .. ربما بزاف دالناس دوزو بزاف أكثر مني و لكن غانرجعوا للحساسية بتلحرام ..

جاي من أسفل السافلين بجينات طالع فيها التركيز ديال مادة هاجس البقاء و عنداك نموت بالجوع .. و كابر في تناقض بين جحيم الزنقة القاسية و بنادم تايموت و يتشرد كل نهار قدام عيني و نعيم المدرسة بريفي في حي دالفيلات لي لو تعاودات حياتي ألف مرة ماكنتش نمشي نقرأ فيها ..

12 عام كانت كفيلة باش ترجعني لقسم فيه أنا و شي ناس قلال لي الهدف ديالنا هو القراية .. شفت كل عام تلاميذ تايخرجوا من المدرسة للزنقة و شفت مرات عديدة أساتذة تايخرجوا من القسم للسبيطار ..

مشيت عاوتاني قريت مع أذكى ناس شافتهم عيني و تحولت للكيدار د القسم و جربت الفشل الذريييع و في الأخير زدت علم آخر و خديت الباك بأعجوبة ..

و كملت و كملت، قسحت راسي في مرات و تبعت التيار في مرات أخرى و تفرجت في بزاف ديال الأفلام بلاصة مانمشي نقرأ و لكن في الأخير تخرجت و خدمت و تميزت شوية و عمر الجيب و سافرت و سافرت و سافرت .. و في الأخير ها أنا ذا ..

ماشي بززاف و لكن بالنسبة ليا را بزاااااااف ..

تلاقيت مع عتاولة القباحة دالزنقة و تنافست مع القراية ديال المدينة كاملة و دزت من حدا السلفية الجهادية و تعاركت مع الملحدين و دزت من حداهم حتى هوما و تصوفت ههه و درت السياسة و مشيت لحلقيات د20 فبراير بالتخبية و درت السياسة و غيبت عام كامل و سقطت في الباك و دوزت الديبرسيو و الايدياشدي و السمقمق و كنت غانلوح راسي من فوق العمارة و تصوفت ههه و تلاقيت بناس مكحطيييين و تلاقيت مع ناس لاباااس عليهم و سافرت و بت في الزنقة و عند الناس و تهورت و زهقت من الموت ماشي مرة ماشي جوج و عشت بوحدي و عشت مع الناس و تخلويت و صرفت بزاف دالفلوس و عشت بزيرو و مرضت مرضات خايبين و تصوفت ههه و و و

و هاذشي كامل و جزء كبير من الذاكرة ديالي تمسح في واحد المرحلة من حياتي و هاذي قصة لنهار آخر ..

هاذشي كامل ماشي باش نقول أنا واعر أو أنا مدوز .. خرج غا للزنقة ولا دخل لانستاغرام غاتلقى ملايين دالناس عاشوا أكثر من هاذشي ..

و لكن في واحد المرحلة في الحياة ترسب هاذشي كامل في دماغي بشوية بشوية و أدى لواحد اللعيبة في شكااال:

مابقات حتى حاجة تاتبهربي

الفوحان مابقى تايدي مني لا حق لا باطل .. تاندخل للستوريات ديال انستغرام ايلا مافرحتش أو كرينجيت را ماتانحس بحتى شي احساس ديال باغي حتى أنا ندير أو حتى أنا نكون ..

الصالير، الممتلكات، التسافير، العلم، الانجازات .. و أي حاجة مابقات تاتبهرني ..

العجيب هو هاذ القضية ديال المقارنة و “الحسد” (الحسد كلمة قاسحة شوية و لكن مالقيتش شي كلمة باش نعبر على ذاك الاحساس) كانت محورية في حياتي واحد الوقيتة .. أنا لي كنت منخرط في السيستام بجهد و كنت ايلا جيت الثاني في القسم تانتقمص و من بعد ايلا عرفت شي حد تايتخلص أكثر مني تانتزير (هاذي ماشي بزاف حيت كانت بداتني هاذ الحالة) ..

و هاذ القضية عاوتاني ماشي باش نقول واو أنا واعر و و و .. ماشي من شيمي ههه .. و لكن باش نقول بلي مابقى عندي شغف بتا والو .. مابقيت باغي لا نكون أنا هو أغنى رجل و لا أذكى امرأة و لا نسافر للمالديف و لا نشري طيارة .. كلشي هاذشي مزيان و نقدر نوليه أو نديرو شي نهار .. و لكن ولاّ عندي بحال براد في قهوة الدرب بحال تسافيرة للشمال بحال طلعة لتوبقال بحال نعسة في السداري .. حتى حاجة مابقات تاتبهرني ..

وليت خاوي من الداخل هههه

عاود هاذشي ماتايعنيش أنه ايلا وليت أغنى رجل غانرمي الفلوس في الزنقة ولا كابقيتش غانسافر ولا مابغيتش باقي نمشي لعين الذياب نغني يوم مايشبه يوم .. مازال غاندير هاذشي و غانفرح بيه و كلشي ..

تفو حسيت براسي شرحت و بررت بزاف .. يااااا ربي تفهم ههه .. و حتى ايلا مافهمتي والو .. المهم كاينين واحد 3 أو 5 دالناس على الأقل في حياتي عارفيني كيداير و فاهميني علاش تانهضر.

الحياة صعيبة

الحياة صعيبة .. ماصعب منها ماكاين ..

واخا تانعياو مانمثلوا و نطلقوها على بعضياتنا بالشعارات و الحكايات .. الحياة تاتبقى صعيبة .. منين ما جيتيها تاتبقى صعيبة ..

تاتكبر ايلا مالقيتيش راسك خاسر بشي ربعة لزيرو مع دوك الجينات العوجين و العرمة ديال العادات السيئة و العقد النفسية و الترومات (ماتاتعجبنيش هاذ الكلمة ههه) و مع ضغط المجتمع و بنادم الله يهديه و المشاكل دالاقتصاد و العرضة للأمراض و التوقعات و و و و ..

و فوق هاذشي كامل الحياة مامسوقاش ليك في مرة و ماعندهاش غير أنت و نهار لي تاتهبط لا ݣارد تاتبدأ تخشي ليك في الكروشيات حتى تايخفافو ركابيك و تاتضربك بنص ههه

شحال قد بنادم مايهز و مايتحمل ..

أوووو من بعد ..

من بعد تلاثين عام تقبلت هاذ الحقيقة .. الحياة صعيبة و ماعندي ماااانديير .. و هاذي أول خطوة في الطريق الصحيح ..

و ايلا صعيبة و ماعندي ماندير .. ترخى و استمتع بالسليخ هههه .. من تجربتي المتواضعة الحياة سادية تايعجبوها الناس لي تايقاوموا و لي تايتزيروا معاها .. ماحدك تاتزير و هي تاتزير ..

ديك النهار مشيت نصايب شي وراق .. و بقيت تانتسنى شي ساعتين و في اللخر قالو لينا السيستام طايح .. في هاذ الحالة ماكان عندي ماندير .. المغرب داير هاكا، و ايلا بغيت نبدلو غايخلصني ثورة فكرية و مجتمعي و و و و ذاكشي ديال الكتوبة و التلفزة و من جهة أخرى أنا ماقادش نعطي الرشوة حيت تاتجيني ثقيلة (بسبب التربية) .. صافي قلت مع راسي “أوكي .. مرة أخرى ان شاء الله” .. مباشرة موراها سيستام رجع هههه (الأفضل هو بزاف دالناس مشاو و قربات نوبتي أكثر).

و نهار آخر مؤخرا .. كنت مسافر و ضربت واحد الطراجي معوج حيت واحد الكورتي شلاهبي قال لي بلي غانلقى الطرونسبور موجود منين نوصل .. و منين وصلت لقيت الرررررعد، لقيت لععددددددس هههه .. و صافي قررت أنني نعرب عن القلق ديالي و مشيت للمحلبة ضربت الرايب و الحرشة حتى يحن الله هههه ..

الحياة فقدات معايا الأمل وليت تانجيها ممل هههه

أنا هو السبب

هاذ الفكرة تكملة للفكرة لي دازت .. الحياة ديالي ديالي .. بغيت ولا كرهت أنا لي مسؤول عليها ..

ذاكشي علاش ماتانتشكاش .. ماعاقلش على راسي فوقاش تشكيت على شي حد و لا حتى على راسي .. و ايلا عاقل بلي تشكيت عليك شي نهار را كنت غا تانعاود ليك .. ولا تانتافق معاك في الشكاوي ديالك باش تهون ..

الحياة ديالي سهالت نهار فهمت هاذ العجب .. حسيت براسي بحال ايلا اكتشفت النار و لا شربت أتاي أول مرة ..

بالإضافة لهاذ تحمل المسؤولية طورت واحد الفريموورك باش نحل المشاكل ديال الحياة لي كاملة أنا السبب ديالها:

• 76٪ ديال المشاكل تانسكيفيها
• 21٪ تانحولهم
• 87٪ تانخرا عليها بالضحك
• 2٪ ديال المشاكل لي بقاو تانحلهم

قبل ماتقول ليا المجموع أكبر من 100٪ .. را ماكاينش غا مشاكلي، كاين حتى مشاكل الباشار ههه

و هاكا مابقاوش تايخلعوني المشاكل .. بالعكس ولاو تايعجبوني حيت أصلا عارف بلي دياولي و ماكاينش لي يجي يتزاحم معايا فيهم ..

أخيرا المستوى اللخر ديال هاذ القصية هو منين تاتفهم بللي أنت المسؤول على كيفاش تاتحس .. فرحان و لا معصب و لا حزين را مسؤوليتك .. و ايلا كنتي في الحالة العادية ديالك را أنت لي تاتحكم في كيفاش تحس .. و العالم الخارجي بيك و لا بلا بيك غادي يكمل الوجوود ديالو كيفما هو .. و بنادم غايبقى مريض تقلقتي أولا لا .. و هكذا و هكذا ..

العام الفايت شدات الشتا سيمانة ماسحاتس .. على شوي ماكنت غانبدأ نكتائب و نتشكى و نعاير في السحاب .. ساعا صدقت لابس أمبيرميابل و خرجت تاندور بوحدي في الزنقة كيشي سبع هههه ..

نحطوا خطار: ايلا كنت ناعس سويعاتي و شارب ماتيسر ديال الماء و صحيحتي مزيانة ماكاينش شي ولد و لا بنت المرا لي يخصر ليا نهاري ..

الهضرة د الناس مهمة و لاينعل#$ـ’&$

هاذ التلاثين عام لي عشت .. غانكون ضيعت النص ديالها تانحاول نقنع راسي بلي الهضرة دالناس و الشوفة ديالهم ماشي مهمين ..

دابا هوما را ماشي مهمين في المطلق و في النظري .. و غالبا حتى واحد ما دايها فيك بزينك و بهبالك .. و لكن اللعنة هي أننا كإنسان مكتوب علينا أننا نعيّشوا معانا المجتمع في ضماغنا و ندخلوه في المعادلة ديال أي حاجة تانديروها ..و هاذشي علاش تطبيقات السوشيل ميديا من أنجح التطبيقات في التاريخ ..

و هاذ اللعيبة كانت تاتحرق ليا بزاف ديال الطاقة أكثر من تمارين البطن .. كنت منين تانجي ندير شي حاجة تانبقى مدابز غير مع راسي لي تايحلف و يعاود بلي ماغايديها في حتى واحد و هاذشي تايديرو لراسو و مامسوقش لحتى شي قمقوم و تا مالهم تايحطوا ليا الماكلة في الطبسيل ..

وا تا رخف شوية .. راك دايها في بنادم و كيفاش تايشوفك .. و عادي ماشي مشكل .. مافيها باس .. الله يرزق غا الصحة و السلامة ..

أنا أكثر إنسان هداوي و مامسوقش ظاهريا .. و حتى باطنيا أحسن من بزاف دالناس في هاذ النقطة .. ذاكشي علاش جيتكم من المستقبل باش نقول ليكم تتصالحوا مع فكرة أن النظرة د الناس مهمة و ضرورية والاّ كون مشيتي عشتي بوحدك في الجبل أو على الأقل حيدتي انستاغرام هههه ..

واحد السؤال زوين تايعجبني نسولوا للناس

ايلا عطيناك موارد لا متناهية باش تسافر العالم و تحقق أي حاجة بغيتي بشرط أن ماتشارك هاذشي مع حتى واحد، لا تيليفون، لا سوشميديا لا محادثات مع الناس على شنو درتي .. تقبل؟

الحرية

الحرية هي مايكون حتى حد ولا حتى حاجة تايتسنى منك شي حاجة .. غذا تنوض تبغي تمشي لشي جايحة تمشي، تبغي تطفي التيليفون على الكل تطفيه ..

ماعندك كريدي خاصك تخلصو، ماعندك شي حد تايتسناك تعطيه شي حاجة، ماعندك أهداف تاتجمع ليهم فلوس و ماعندك ثلاجة خاصها تعمر كل شهر ..

عيقت شوية في التعريف و لكن الفكرة باينة تانظن .. و هنا غانسارك المبادء ديالي مع الجيل الناشئ (الشراف بحالي حيدو شوية):

• كلما امتلكتي أقل كلما أحسن (امتلك باش تستثمر ماشي باش تكدس)
• ماتسلفش (و خاصة من البنكة)
• ماتسلفش (و خاصة من البنكة)
• ماتسلفش (و خاصة من البنكة)
• ماتربطش راسك بشي حاجة معينة لي أنت قادر تتخلى عليها (البلية، السكين كير، الحوايج، الماتشا، لاصال غالي، العياقة …)
• ماتسلفش (و خاصة من البنكة)

واحد الحاجة لي بغيت نوضح هو العياقة: العياقة هنا هو تحط راسك في خانة اجتماعية ماشي ديالك و ماشي ديما ضامن غاتكون فيها ..

من بعد تلاثين عام الحاجة الوحيدة لي تاتجيب ليا التقية من غير بعض البوستات الكرينج ديال السوشميديا هي أنني نملك بزاف ديال القش و التخربيق لي مازايدني حتى حاجة في حياتي .. و دابا ايلا جيت نريح معاك و نشوفوا شنو تانملك من الأشياء (ماشي الاستثمارات ههه) غانقدرو نحسبوهم بيدي و يدك ..

التوقعات ديالي تمرمدو في الأرض

ما حدني تانكبر ماحد التوقعات ديال تايزيدوا يطيحوا .. التوقعات من كلشي، من الحياة، من الناس، من راسي هو الأخير التوقعات ديالي منو طايحين

وا ماكترت ما طاحوا التوقعات ديالي ولى هاذشي مزعج شي مرة .. نقدر نحط براد ب 7 الدراهم في أحشر قهوة و نحضي لي غادي و لي جاي و نكون أسعد رجل في العالم .. وا وليت ساهل هههه

نقطة أخرى هي بنادم .. وا ولاو التوقعات عندي مع بنادم طااااايحين .. مثلا ايلا درت شي بليزير في شي حد ماتانتسنى منو واالو في المقابل و حتى ايلا رد ليا البليزير بشي كعية ماتانتسوقش ماشي شهامة مني و لكن حيت بالصح مابقيتش مسوق .. دوك الأسئلة ديال ماذا لو خانك صديق العمر مابقاو تايديو مني والو .. يقدر يكون عندو شي ظروف و لا طلعت ليه في راسو و مشى .. الله يسهل عليه يا ربي ..

ديك نهار كنت تانصايب شهادة السكنى و زربات عليا واحد البنت في النوبة .. كون زربات عليا و سكتات ماكنتش غانتسوق ليها .. و لكن هضرات، صدقت لاعب ليها في ضماغها واحد شوية ههه و قلت ليها في اللخر “دخلي ايلا يغيتي تدخلي أنا مازال هنا” و بالصح عنيتها ماشي غير ضد ..

و نفس الحاجة حتى مع صحابي و صحاباتي سيرو سولوهم ماتانتسنى منهم حتى شي حاجة من غير الوجود ديالهم الجميل .. ارا شي بوسة ليماك لهنا ..

اللي تايتعنّى بالقوة تايموت بالضعف

ايلا كانت شي باترن لي شفتها تاتعاود بزاف دالمرات لدرجة أنني وليت شاك بللي راها قاعدة .. هي أي واحد قوي و تايحس براسو قوي، غاصبر عليه حتى غاتشوف ضعفو و غايبقى فيك و لا غاتشفى فيه ..

شفت أباطرة دالقباحة و الإجرام ماتو قدامي بأتفه الطرق .. و شفت أذكى الناس سالات بيهم الحياة في وضعيات قاسية .. و شفت يوتوبرز لي ضربو في السقف و مشاو ليهم المشاهدات بين ليلة و ضحاها و تلفات ليهم الجرية و شفت بنادم لاباااس عليه و المخيرة ديالو سلات بيه الأيام في جسد هزيل و مريض تايتنقل من دار لدار ..

الواحد مهما كان قوي يطلب السلامة .. را هاذ الحياة بتلحرام قبيحة و ما فيها تيقة هههه

الصحة و يا الصحة

خلينا من هاذ الفلسفة الخاوية كاملة .. أهم حاجة في الحياة هي الصحة .. واخا باينة وَذَكِّرْ فَإِنَّ الذِّكْرَى تَنْفَعُ الْمُؤْمِنِينَ ..

أنا انسان مفرّط شيء ما في هاذ الجانب و لكن نهار على نهار تانتعلم شحال الصحة مهمة.

و حتى ايلا أنت بحالي مفرط و لا أصلا عندك شي صحيحة على قد الحال .. ماكاين باس المهم هو حاول عليها و حطها الأولوية رقم واحد بطريقتك و في حدود استطاعتك ..

الجزء التلاثين

جيت نكتب شنو مازال جاي في المستقبل مالقيت مانكتب ههههه .. قلت ليك را مابقات حتى شي حاجة تاتبهرتي و وليت باغي غا التعادل و أصلا راس المال ديالي من الحياة دخّلتو هههه .. المهم باش مانخليكش بلاش هاذو شي لعييات ..

• الصحة: را باينة، باغي نطلع الصحة للمرتبة الأولى في لائحة الأولويات .. و خاصة باغي نبدأ ننعس بالليل ..
• غانبدأ نقول لا شوية: أنا إنسان ساهل .. تلنقول آاه لأغلب الحاجات و أغلب الأشياء و دابا معول نبدأ نقول لا شوية غير باش نسترجع السيطرة على الوقت و الأتنشن (لي ماتاندير بيهم والو أصلا هههه)
• الاشتراكات: من الحوايج لي باغي نقول ليها لا أكثر هوما الاشتراكات .. يعني الحوايج لي مفرود عليا نعطيهم الاتنشن ديالي بصفة دورية بحال الأخبار و يوتوب و غيرهم ..
• الحرية: يا ربي تسهل في شي باسيڤ انكامات عديدة .. باش نبدأ ندير لي بغايت .. دابا أصلا أنا انسان مينيماليست و نقدر من غذا ندير لي بغايت الحمد لله غير هو بغيت نديرها و أنا مامخلوع أقل و ما نادم على والو ..
• الاختفاء: عندي واحد الفونطازم ديال الإختفاء من ديما نقدر نديرو لشي مدة قصيرة قريبا ..
• نقدر نتزج

صافي هاذشي لي كاين ايلا بغيتي أكثر كومونطي و نكملوا و لا عرض عليا لشي برااد ..

شكرا على القراءة .. من هنا للهيه هابي بورثداي تو مي .. الله يطول عمري تانشوفك فرحان(ة) مع وليداتك ههه