حماقي بالدارجة

اليوم آكتيفيت إنستغرام و دخلت نضرب دويرة حتى تانلقاه مفركّع بالستوريات ديال قافلة الأمل 4. النسخة الرابعة ديال القافلة الإنسانية لي تايديرها نادي أناروز ديال لينصا دقنيطرة كل عام. و أنا تانشوف في الستوريات كنت غانبكي من الفرحة. حسيت بحال شي أب تايشوف ولدوا كبر و تخرج و ولا شي حاجة كبيرة. الولادة منين دخلت للينصا ماكانش عندنا كلوب إجتماعي، كانوا عندنا شي واحدين و لكن كانوا تايديروا بزاف ديال الحاجات و هاذ الجانب الإجتماعي/التضامني كان غير جزء صغير من ذاكشي لي تايديروا. ...

نهار لاربع نهار طويل دالخدمة، ماسالا غير بزز و ماسالا حتى ساليت تا أنا معاه. تانحس براسي مهلوك جسديا و الأكثر نفسيا. عييت و طلع ليا الدم و كّاع ذاكشي لي ممكن تتصور. أنا: أسامة، ساليتي؟ خارج دابا؟ أسامة: آآه، يالاه نخرجوا في الأول قررنا نتمشاو في الجو لي كان مشتوي شويا حتى لشي مفترق و كل واحد يمشي لدارو، و ماعقتش براسي تا لقيتنا في Decathlon تانشريو Impermeable. أسامة: واو هاذ اللعيبات ناضيين أنا: و الله ايلا بالصح من شحال هاذي و أنا تانقلب على شي حاجة بحالهم أسامة: و لكن ايلا شريناهم خاصنا نجربوهم أنا: هههههههههههه بالصح أسامة: ههههههههههه ...

منين طلعنا لتوبقال مأخرا، السيمانة كاملة ما كليت والو، كرشي كانت في واحد الحالة الله لي عالم بيها. و منين وصلنا للروفيج، شداتني الموت، راسي تايضرني و تانتنفس بزز، دقات القلب فاتو 150 و نسبة الأوكسيجين وصلات عندي ل 70% (يعني بحال شي حد فيه كوفيد و خاصو يمشي للإنعاش) و في الصباح في الطلوع القمة ماكليت والو في الفطور من غير أتاي معشب. و الطلعة كانت من أصعب الحوايج لي درت في حياتي واقيلا، أصعب من الباك هههه. في الطريق شداتني السخفة، الطيارة، الردة، البرد، النعاس (ديال الإرتفاعات) و كّاع العجب لي ممكن تتخيل. ...

السلام مرة أخرى 👋👋 ايلا مازال ماقريتي الجزء اﻷول سير قراه هو الأول عاذ آجي. أخيرا اقتنعت بللي غادي نكمل ال3 ديال الحصص لي بقاو لي .. كانو باقين شي 3 أيام على الحصة الجاية و مع الريجيم و الدواء بديت كانتحسن .. المشكل هاذ المرة، هو أنه ماعندي والو .. خاصني نخلق شي حاجة من والو هاذ المرة .. في الواقع كانوا عندي 3 ديال labs يعني حصة و نص بالريثم ديال الجميع. ...

من بعد أطول سطاج في التاريخ (أكثر من 10 أشهر) قررت نشد لارض و نرتاح استعدادا للعمل الجديد. و بالفعل مازال مادازتش حتى سيمانا، جاتني واحد الفرصة باش نقري طلبة ديال الماستر في فرنسا على Database Security. شوف! منين كنت في المدرسة، كنت مولف بهاذشي، أصلا كنت مسؤول على الفروماسيون بعامين متتاليين في EIC لي هو النادي ديال لانفورماتيك في لينصا. و لكن الفرووونسي آ صاحبي الفرونسي و زيد عليها Database Security لي شي حاجة غير كانسمع بيها و صافي. ...

بنـــــي ملال، كــــــــازا، أزررررو .. حليت عيني المسدودين بالعمش بزز، فين حنا ؟ آخر حاجة عقلت عليها هي ديك المرا مدابزة مع مول الكار حيت هرب عليها. يوسف، يوسف .. فيق ! فيق ! نعام ؟ واش نعسنا ؟ شكون كان حاضي الحوايج ؟ آآ ؟ آآه آآه خليني ناعس .. يالاه نمشيو آ صاحبي را السبعة دالصباح هاذي .. هزينا حوايجنا و خرجنا من المحطة الطرقية للخنيفرة، يوسف معنق الخيمة لي تقطع ليها الكاش، و أنا مدابز مع الصاك “المهرهر” .. قصدنا أول باتيسري، ضرينا بيصارا و شدينا الطريق نحو المجهول - بغيت نقول زاوية الشيخ. ...

اليوم و دابا تاندور في تويتر حتى لقيت واحد الأرتيكل مريتويتيه عثمان تايهضر على الخوف. و أنا نقول مايمكنش مانكتبش على القصة ديالي مع الخوف. تالهاذي اللا ! القصة بدات من الصغر، شوية من التربية و شوية من الإرث الاجتماعي و ربما حتى الجيني ديالي. المهم هاذي قصة طويلة و مافيا مانكتب عليها. آجي ننقزو نيشان للسنة الأولى ديال التعليم العالي .. هنا غادي تبدأ تبان القصة ديالي مع الخوف دبالصح. ...