حماقي بالدارجة

بنـــــي ملال، كــــــــازا، أزررررو .. حليت عيني المسدودين بالعمش بزز، فين حنا ؟ آخر حاجة عقلت عليها هي ديك المرا مدابزة مع مول الكار حيت هرب عليها. يوسف، يوسف .. فيق ! فيق ! نعام ؟ واش نعسنا ؟ شكون كان حاضي الحوايج ؟ آآ ؟ آآه آآه خليني ناعس .. يالاه نمشيو آ صاحبي را السبعة دالصباح هاذي .. هزينا حوايجنا و خرجنا من المحطة الطرقية للخنيفرة، يوسف معنق الخيمة لي تقطع ليها الكاش، و أنا مدابز مع الصاك “المهرهر” .. قصدنا أول باتيسري، ضرينا بيصارا و شدينا الطريق نحو المجهول - بغيت نقول زاوية الشيخ. ...

اليوم و دابا تاندور في تويتر حتى لقيت واحد الأرتيكل مريتويتيه عثمان تايهضر على الخوف. و أنا نقول مايمكنش مانكتبش على القصة ديالي مع الخوف. تالهاذي اللا ! القصة بدات من الصغر، شوية من التربية و شوية من الإرث الاجتماعي و ربما حتى الجيني ديالي. المهم هاذي قصة طويلة و مافيا مانكتب عليها. آجي ننقزو نيشان للسنة الأولى ديال التعليم العالي .. هنا غادي تبدأ تبان القصة ديالي مع الخوف دبالصح. ...

لي تايدير الفلوس تايعيشوا ولادو هاذ المسألة صافي وليت تانآمن بيها، التعلم السلبي (passive) هو لي تانتعلموا منو 90% ديال داكشي لي تانعرفوا، ايلا رديت البال مع راسك غادي تلقى راسك تاتعلم منين تاتوحل في شي حاجة أكثر من منين تاتقراها actively .. هاذ المسألة وقعات لي هاذ السيمانة مع هاذ الجملة السحرية، لي قالها لي الأخ ديالي الأكبر وسط الكلام و دابا تفكرتها و أنا تانقرأ شي حاجات في هاذ الموضوع. هاذ الجملة تاتبان سطحية بالجهد و لكن عندها معنى أعمق بزاااف. ...

اليوم كان الماتش ديال الطاليان مع سويسرا، سويسرا عندها فرقة ناضية و لعبوا مزيان و لكن الطاليان خرجوا غالبين ب 3 ل 0 من أفضل النسخ ديال الطاليان لي شفت من 2006، كانت نسخة برانديلي في 2012 في يامات العز ديال اليوفي و وسط الميدان ديالها (بيرلو و ماركيزيو و حتى دي روسي من روما) و في عز تألق بالوتيلي و كانت نسخة كونتي لي أقل منها بزاف في جودة اللاعبين و أفضل منها كفريق و كلعب و تكتيك في نظري. ...

في نظري باش تربح الدوري خاصك 2 دالحاجات الفريق لأول و الدوام: خاصك تكون عنجك تشكيلة راسمية ثابتة فيها لعابة مقادين و تايلعبوا مزيان في أغلب الماتشات. و ماخاصش يكون الشك أو شي بوسط مامعروفش شكون تايلعب فيه. الفريق الثاني يقضي الغرض: غادي يخاصك لعابة في التوش لي ممكن يقضيو الغرض، إيلا حتاجيتي تبدل شي لاعب أو ايلا تضرب شي حد. هنا تايخاض يكون عندك لعابة لي ممكن يعوضوا أغلب اللعابة دبال الفريق الأول، و ضروري يكونوا عندك على الأقل شي 3 اللعابة للي تقريبا بالجودة ديال الفريق الأول و اللي ممكن تدخلهم في أي لحظة يقلبوا الماتش ...

المهم ايلا كنتي مازال تاتقرا و كان طالع ليك الدم و طايح عليك الضيم و تاتقول ماعندك زهر تفكر: القصة رقم 1: السنة الثالثة ديالي في لينصا: دوزت أول امتحان ديالي نهار السبت و رجعت للدار مسخسخ، غير وصلت نعست باش نفيق نوجد داكشي لي باقي .. لغد ليه فقت لقيت الشاشة ديال البي سي مشخشخة، سديت على ليزيات الوسط .. هبط للكّزا باش نصايبو مالقيتش الشاشة، لقيت واحدة بالزز ب 1000 درهم لي هو الثمن ديال البيسي تقريبا، و هاكاك في سبيل الامتحانات زعمت و مشيت نتيري الفلوس باش نخلص السيد .. ...

اليوم كان نهائي اليوروبا ليغ 2020 .. بمواجهة الانتر ديال كونتي مع اشبيلية ديال لوبيتيجي .. الماتش سالا ب 3-2 لاشبيلية هاذو شي لعيبات زوينين و خايبين على الماتش: الخايبين وسط الميدان خاوي، خاصة عند الانتر، ال 5-3-2 ديال كونتي تاتخلي واحد الفراغ كبير بين الثلاثة ديال وسط الميدان و الجوج لي لقدام. هاذشي علاش تايخاص لعابة ديال الوسط ميدان عندهم work rates طالعين و في نفس الوقت خاص يكونوا تقنيا مزيانين و يقدرو يوصّلو الكورة للقدام. و هاذشي لي ماكاينش في الانتر خاصة الجزء الثاني. التحكيم كان صعيب شوية على الانتر، خاصة من بعد ما عطاش الحمرا لدييغو كارلوس و عاد بزاف ديال الكوفرات لاشبيلة ماكاينينش. الزوينين جوج لعابة هازين الراية المغربية في البوديوم و واحد هاز الراية ديال الأمازيغ. بونو جبد كورة للوكاكو راسو راس بارّة. خيسوس نافاس أسطورة إشبيلية، من بعد سنين برّا، رجع لفريقو الأول و بدل البوسط ديالو و تايعاود يصنع معاهم التاريخ. الضغط لي كان على نافاس و على لوبوتيجي رهييب، و بان بزاف منين سالا الماتش، البكا لي بكاو تاتحس بيهم كان عليهم ضغط رهيب و تحيد منين داوها. نافاس حيت عميد و فرقتو القديمة هاذي و خاص يهزهم، و هزهم على كتافو. و لوبيتيجي أول لقب من بعد الانتكاسة ديال الريال من بعد الفضيحة ديال المنتخب. دييغو كارلوس بطل المبارات مع بانيغا و الأسطورة خيسوس. أخيرا مونتشي و كيفاش هبط احتفل مع اللعابة و حيح في التيران.