ماتش متوسط .. أسوء من ماتش البرازيل و لكن المهم 3 دالنقط و حتى حد ماتضرب .. الماتش تخربق من بعد الهدف المبكر حيت اللعابة ولاو متسرعين ومرعونين .. ضيعنا بزاف ديال البيوت باش نقتلو الماتش ..

اسكتلندا جاو باش يتعادلو في الماتش .. دارو ماتش دفاعي و بدني و في الأخير طلعوا الريتم ..

في الأخير اللعابة طاحوا بزاف بدنيا و كات سكوتلاندا تقدر تتعادل و لكن الزهر بقى معانا .. فرصة أخرى ممكن وهبي يتعلم و يزيد يكبر في البطولة ..

بونو

بونو ماتجربش بزاف .. ما تتارتش عليه حتى كورة .. و لكن دار شي خرجات مزيانين .. و في واحد اللقطة كاح للأرض باش يهبط الريتم باش اسكتلندا هاجو علينا .. بالرجل لعب أفضل مقارنة بالماتش لي فات .. لعب كورة في الأرض و الأهم لعب كرات أقل حيت مارضوش ليه كرة أصلا .. كانو شي تفزيعات غير مفهومين تايصيفطه للحارس ديال اسكتلندا ..

ديوب

ديوب في الالتحامات مزيان .. و لكن تانحس بلي غادي يقتلنا في شي ماتش مهم و عمرنا غادي نعاودو نشوفوه في شي ماتش من بعد المونديال .. ديوب برجليه 0 و هاذ الماتش مالعبش كرات بزاف القدام و لكن كان تايعطي لشادي رياض بلاصة بونو .. عاوتاني دار آطسيو كان غايقتلنا و كون كان حكم رطب كان يعطيه حمرة ..

شادي رياض

أحسن لاعب اليوم .. دفاعيا كان وحش .. بوحدو حيد شي 3 دالكرات ديال البيت لسكوتلاندا .. و في رجليه مصلوح بزااف، خرج كرة بطريقة نقية ..

حكيمي

حكيمي اليوم ماجاش .. حكيمي راسو في المحكمة ديال الإيليزي و رجليه في التيران .. كان سيء جدا في إتخاد القرارات، في الرجوع للدفاع، في المساهمات الهجومية .. حكيمي لحد الساعة من أسوء اللاعبين في البطولة مقارنة بالبروفيل ديالو ..

الحاج المزراوي

المزراوي ماخاصنا نبقاو ندخلوه في الترتيب ديال أحسن لعاب .. عكس حكيمي، المزراوي هو أحسن لعاب تايعطينا في المنتخب الوطني المغربي .. ماعمرو ماقصر معانا .. ديما تايعطينا 100% بالإضافة أنه لاعب ذكي و واعر دفاعيا، و هجوميا و رجليه مصلوحين و كلشي .. الله يخلي لينا الحاج و يبارك ليه في صحيحتو ..

بوعدي

بوعدي ضد البرازيل دار ماتش ديال 11/10 و اليوم ضد استكتلندا دار ماتش ديال 7/10 .. خرج ماتش عادي، مزيان .. كان تايعطي أوبسيون ديال التمرير لصحابو .. تايلعب باس مزيان .. تايدافع مزيان .. زيادة اليوم واجد وسط كيدان أحسن و عامر أكثر .. تايبقى لاعب ذكي و تايلعب كرة نقية .. ماتش بحال هذا مزيان و ضروري باش تبعد منو شوية العين ..

العيناوي

ثاني رجل مقابلة .. كيفما تانقول ديما العيناوي تايعطي 8/10 مستقرة ماتايهبطش عليها .. اليوم عمّر التيران كامل .. مابخلش علينا بالمجهود و لعب كورة مزيان .. ضيع شي تيرات و لكن هذا كان المشكل ديال كولشي ..

أوناحي

اليوم ماكانش أسوء من الماتش لي فات و لكن كان باقي أوناحي ماشي هو أوناحي .. ضغط مزيان، جرا بزاف و ماعطلش كورة بزاف و لكن ماكانت عندو حتى شي قيمة مضافة ..

الخنوس

في ال30 دقيقة الأولى لعب مزيان خاصة دفاعيا .. و لكن من بعد قل المستوى ديالو .. و الأهم ضيع بيت بواحد الرعونة عمرني شفت بحالها ..

دياز

حكيمي عندو عذر علاش كان عيان اليوم .. دياز كان من أسوء السيئين في الفريق .. من غير الباص العظيم لي عطى للصيباري .. شد كورة بزاف و تاتحس بيه باغي يكون ميسي .. ضيعنا في بيت محقق على الأقل .. و ضيع فرص بزاف و في بزاف دالوقيتات مارجعش يدافع .. دياز ماعرفتش علاش باغي يهزنا على ضهرو و ماتايلعبش الساهلة ..

الصيباري

دار ماتش مزيان .. مع وهبي تايزيد يبين ماتش مور ماتش بللي لاعب ذكي بزاف و فنان .. في اللخر دالماتش تسالا بدنيا و طاح المستوى ديالو ..

التغييرات

اليوم التغييرات كانو معطلين بزاف .. هاذشي تايبين بلي ماعندناش دكة مزيانة و المدرب براسو ماتايقش فيها بزاف .. المشكل في نضري هو أنه ماكانش وقت كافي باش وهبي يشوف اللعابة لي الدكة لي أغلبيتهم لاعبين جداد عمرهم لعبو في كأس العالم ..

أحسن واحد بالنسبة ليا في لي دخلو اليوم هو أمايموني .. دار قيسات مزيانين .. ضيع بيت و لكن عاوتاني بحالو بحال خوتو .. المهم دفاعيا كان مزيان و هجوميا دار شي مراوغات صحاح و حاول .. خاصو أكثر دالوقت داللعب و يماركي شي بيت و غايولي بديل مهم ..

الطالبي دار واحد الخطأ فادح دفاعيا كان غايقتلنا .. بان مامفاهش مع الحاج و خاصة أن الحاج كان عيا .. الرحيمي دار دخلة أقل بكثير من الماتش لي فات .. مرابط دار ماتش عادي تا هو ..

عموما الأهم هو 3 نقط و التأهل .. الماتش الجاي كانتمنى نماركيو بيوت أكثر بالزربة باش يبقى لينا الوقت باش نجربو أكثر داللعابة و أكثر ديال الأفكار لي ممكن تنفعنا في الماتشات القادمة ..