السلام مرة أخرى 👋👋 ايلا مازال ماقريتي الجزء اﻷول سير قراه هو الأول عاذ آجي.
أخيرا اقتنعت بللي غادي نكمل ال3 ديال الحصص لي بقاو لي .. كانو باقين شي 3 أيام على الحصة الجاية و مع الريجيم و الدواء بديت كانتحسن ..
المشكل هاذ المرة، هو أنه ماعندي والو .. خاصني نخلق شي حاجة من والو هاذ المرة .. في الواقع كانوا عندي 3 ديال labs يعني حصة و نص بالريثم ديال الجميع.
هاذ المرة جمعت راسي و قررت أنني ندي هاذ التجربة لمستوى آخر، و ناتفلاش مع الوليدات خاصة و أنني كونت معاهم واحد الرابطة صغيورة.
كان باقي لي 3 أيام، من بعد مارتاحيت شوية بديت الخدمة .. واخا الدرس كان طويل ماكانش فيه بزاف ديال الحوايج على SQL Injection لي هي واحدة من أهم الثغرات في العالم ديال Relational Databases. و هاذشي علاش قررت نيدا نقاد درس على هاذ النوع ديال الثغرات
من بعد التقليبة الأولى مالقيت تا حاجة مفيدة .. الهدف كان هو نفهم أنا بعدا عاد نقاد الكور. شوية من هنا وشوية من لهيه و مازال ماقدرتش نفهم الأمور مزيان.
في الواقع كنت فهمت و لكن ذاكشي بقا مرون ليا في دماغي و كنت مجتاج شي حاجة مقاد لي غادي تخليني نرتب أفكاري.
من بعد بحث طويل رجعت لمحبوبة الجماهير ويكيبيديا و مشيت لي واحد البلاصة للي الأغلبية دالناس ماتايوصلوش ليها و صدقوني هي أهم بلاصة، دايرة بحال شي كنز، غالبا ماتاتلقى فيها شي حوايج غابرين و خصوصا مفصلين مزيان. هاذ البلاصو هي بلاصة المصادر بيان سيغ.
لقيت واحد الورقة بحثية ناضية، قريت منها شي صفحات و بالزربة جاتني طويلة و فيها بزاف ديال الحوايج لي ماغانحتاجهمش. و هاذ المرة مامشيتش بعيد هبطت للمصادر ديال نفس الورقة البحثية و لقيت واحد مولاي لارتيكل، مولاه الله يعطيه الصحة داير دراسو بيبليغرافية على جميع أنواع SQLi و مقصمهم على أصناف كبار و كل صنف شارح الأنواع لي فيه.
شديت هاذاك لارتيكل و حليت غوغل في الجنب و بديت الخدمة، كل نوع تانقراه من لارتيكل، شي مرات تانفهم شي مرات لا، و هنا فين تاحل غوغل و تانبدا التقلاب و لا تانمشي للممصادر لي كاينين في لارتيكل براسو و تانقراهم.
ماجيت نسالي حتى لقيت عندي عرام ديال المقالات البحيثة و الكتوبة في الديسك دير كاين منهم لي قريتهم من الراس تال الراس، و كاين لي غير طليت عليهم و كاين لي غير تيليشارجيتهم على والو هههه.
من بعد ماساليت الكور تحلوا عينيا على بزاف ديال الحوايج ماكنتش عارفهم. عاد عرفت علاش التعليم العالي مرتبط بالبحث العلمي، و عرفت شحال صعيب باش تصايب كور من الزيرو، و شحال صعيب تفهم داكشي لي تاتقري و تقدر تلقى شي طريقة مزيانة باش توصلو لناس آخرين.
جا اليوم الموعود، و بداو الحصص بشكل عادي، و كيف العادة، تانبداو الحصة بالغياب و موراها تذكير عام على شنو قرينا و موراها تانتوكلوا على الله.
الحصة الأولى كانت الدرس ديال SQLi و في العشية كملنا واحد الشوية في النظري و ختمناها في واحد الTP ديال sqlmap لي هي أداة تاتسهل علينا الSQLi Exploitation في الحالات المعروفين و الباينين. في هاذ التي بي كنا استعملنا واحد التمارين من OWASP DVWA و OWASP Goat. حاولنا نكملوا كولشي داك النهار باش يبقى لينا الوقت لحوايج آخرين و لن ماقدرناش في اللخر.
النهار الثاني من بعد مادرنا الطقوس (الغياب و التذكير ههه) دزنا بالزربة كملنا على ذاكشي ديال لبارح باش ندوزو لLab الأول ذاز النهار كامل مع 2 ديال labs و سالا بالزربة.
النهار الأخير وصل، وهاذ المرة ماشي بحال السيمانة الأولى، هاذ المرة جا بالزربة. بدينا النهار بالطقوس عاوتاني و درنا الLab الأخير لي كان أسهل نسبيا.
قبل من النهار الأخير كنت بديت كانوجد درس آخر ديال Infrasture Auditing automation و لكن حبس حيت ماكانش الوقت كافي باش نديروه تا هو. من بعد ماكنت مخلوع لا مايكفاونيش resources باش نكمل 3 دالحصص، صدق الوقت لي ماكافينش باش ندير كّاع ذاكشي لي في بالي.
منين كانوا خدامين على الlab بديت خدام على الإمتحان لي كان على شكل Quiz على كّاع ذاكشي لي قرينا. و سمحت للناس لي سالاو الLab يمشيو يراجعوا للامتحان. سالا الصباح و جات العشية. سالا الكور و سالاو التمارين و labs و بقى غير الامتحان لي ماغايخدش أكثر من 40 دقيقة.
هنا خدمت الذاكا و القوالب لي تعلمت من أساتذتي الجميلين، و عطيتهم الساعة الأولى باش يراجعوا الدرس، و للي عندو شي سءال يسولني قبل ساعة الحسم. هاذشي أكيد من بعد مادرنا الطقوس هههههه. هاذ الساعة كانت مفاجئة بالنسبة ليا حيت سولوني بزاف فيها أكثر من الحصص كاملين لي جازو مجموعين. و هاذشي لي تايبين باللي الطلبة في العالم كامل كامونيين و حتى تايقرب الامتحان عاد كايوليو مهتمين .. المهم ضحكت على راسي مزيان من وليت تانشوف شي حوايج عاذ البارح منين كنت تانقرى كنت تانديهم.
المهم ساعة ديال “أستاذ شنو غادي تحط لينا؟” و “واش هاذ البارتي داخلة، و ايلا داخلة واخا تعاود تشرحها لينا مافهتهاش مزيان؟” و ساعة ديال التقلقيل و محاولات الاستنطاق باش يجبدو مني أيتها معلومة على الإمتحان. “أستاذ هاذي صعيبة غادي تحط ياك ؟” هههههه
هاذ اللعيبات كانوا طوال الحصص، بزاف ديال المرات كانوا الطلبة تايتعاملوا معايا بمنطق الأستاذ للي من جيل آخر و نقدروا نغمقوا عليه بالزرية، و هو بنفسو لي كنا شي مرات تانتعاملو بيه مع أساتذتنا لي كانو عايقين بقوالبنا و تاحرامياتنا و غير شادين لينا الحاطر، الله يسمح لينا منهم.
سالات الساعة، الوليدات بداو التدواز من يعد ما واعدوني بللي ماغاديش ينقلوا. سالا ذاكشي من بعد ساعة و شي حاجة تقريبا و رجعنا تجمعنا في Discord. هاذ الساعة الأخيرة كانت أصعب و أجمل ساعة في هاذشي كامل.
بدات بالطلبة تايشكروني وتايمدحوني، و هاذشي لي عجبني بزاف مانكدبش عليهم.
Le monsieur, il est petit! il est gentil, pas de zkir sur l’absence, durant le cours pas de ghwatiii
و من موراها تكاو عليا بواحد الفيضان ديال الأسئلة، شنو تاتدير، فين خدمتي واش Blue teamer ولا Red Teamer كيفاش نوليو بحالك، شكون غايقرينا الموديل الجاي كيفاش غادي تحسب لينا النقط، قول لينا واش نجحنا من دابا. قهروني وليت طالب غا التعادل في واحد اللحظة ذاز داكشي زوين حاولت نجاوبهم على قدر المستطاع و قلت ليهم شكرا على المتابعة إلى اللقاء. و سالات القصة …
بلاتي بلاتي .. مازال ماساليناش، منين ساليت الدرس رتاحيت شي يامات و نضت مشيت جمعت جميع الرابورات ديال TP لي كانوا سيفطوا ليا و جمعتهم على جساب المجموعة و بديت التصحيح.
أسوء و أصعب مرحلة في هاذشي كامل هي مرحلة التصحيح و التنقيط، قمة الصعوبية و التعنكيش هي لي تاتدوز منها في مرحلة التصحيح، خدات ليا شي يومين في اﻷخير و جمعت النقط و قسمت شي على شي و حطيت النقط النهائيين. في آخر المطاف الأغلبية جابو مزيان، كانت أضعف نقطة في 14 ولا 15 ماعقلتش.
المهم النقطة كانت مقسومة على 3 ديال النقط
- نقطة فردية فيها الlabs بمعامل 3 و المشاركة و الحضور بمعامل 1
- نقطة جماعية فيهاالنقطة ديال البريزونطاسيون و النقطة ديال TP بنفس المعامل
- نقطة ديال الامتحان النهائي
صافي هاذشي لي كاين، هنا القصة سالات ديال بالصح و مابقى لي غير نشارك معاك شوية من يزاف ديال الدروس لي تعلمت من هاذ التجربة:
- صعييييييب بزاف باش توجد درس و تيدي وتيبي و داكشي .. منين كنت في المدرسة كانت تاتجيني شي حاجة ساهلة بالنسبة الأساتذة .. و لكن منين جربت صدقت قبل كل درس خاصني نبات سهران باش نقاد شي حاجة.
- من أصعب الحوايج لي ممكن تجيريهم هو الفرق بين الريثم ديال التلاميذ، تاتلقى شي واحدين لي معولين 100% على الدرس و شي واحدين أصلا داكشي قاريينو و بالنسبة ليهم أنت ثقيل و غير تاتخربق.
- شي مرات تاتلقى شي طلبة هااااربين و فاهمين داكشي لي تاتقري و تاتجيهم الحصة مملة، وداكشي بديهي، و تاتلقى صعوبة باش تقنعهم يتبعوا معك و لا يشاركوا
- واخا منين كنت تانقرى ماكنتش تانحمل الغياب و ديما مغيب، تايبقى وسيلة مهمة و فعالة باش تقنع بنادم يحظر للحصة ههه
- صعيب بزاف باش تدير امتحان متوازن لي تايدوز على المقرر ديالك كامل من الأول تا اللخر و ما تزكّل والو و يكون في نفس الوقت في المتناول و ماساهلش أكثر من القياس.
- صعيب باش تقدر تقيم الطلبة ديالك في وقت قليل، واخا مع الامتحانات و الحصص و ذاكشي ماتاتقدرش.
- أصعب حاجة جاتني في التدريس هي أن الطلبة تايشوفوا فيك القدوة ديالهم و تايتسناو منك توجههم و شي مرات تايتسناو منك أكثر من الطاقة ديالك .. شي مرات تايتسناو منك تكون عارف كولشي، و ماتغلطش. (الأستاذ تا هو عندة الحق في الغلط، و الكالاخ، و جميع الحووايج لي انسانيين)
- من الحوايج لي صعاب عاوتاني هو كيفاش تجيري الوقت الميت، منين تاتسالي شي بارتية قبل نهاية الحصة، و لا منين تايخرج ليك شي وقت خاوي لي ماكنتيش معول عليه هههه
أخيرا هاهو الدرس ديال SQLi ايلا بغيتي تقراه, و السلام.