في نظري خاصنا كلنا نبداو نتفرجوا في الأفلام الهندية ماشي لجودتها فقط و لكن حيت تاتعالج مواضيع لي تاتقيسنا كمغاربة بحكم تقارب البنية المجتمعية و بحكم أن الهند دازت أو مازالت في المرحلة النمو.
و باش نشرح أكثر غاذي نهضر ليكم على هاذ 3 الأفلام:
الفيلم الأول هو Idiots 3 لي تايحكي قصة بحث واحد الجوج شباب على الصديق ديالهم لي كان تايقرا معهم في مدرسة المهندسين .. و خلال الرحلة تايتفكروا شنو دوزوا مع بعضهم في المدرسة .. المشكل لي تايعالجوا الفلم (جزئيا) هو مشكل الضغط في التعليم العالي بحيث أن كولشي تايولي خاصو يجيب مزيان و يجي هو الأول مهما كانت الطريقة و لو كانت على حساب التكوين و المعرفة ..
الفيلم الثاني هو PK لي تايعاود القصة ديال واحد المخلوق فضائي (تايشبه للانسان) تاينزل في واحد الصحراء في الهند .. و تاتسرق ليه القلادة ديالو لي فيها جهاز التواصل مع المركبة لي جابتو للارض و تاينطالق في رحلة بحث على القلادة لي بلا بيها مايمكنش يرجع للكوكب ديالو ..
القصة تاتبدأ فعليا من بعد ماتايتعلم اللغة ديال الانسان و تايمشي لمدينة دلهي باش يبدأ البحث فيها .. تما تايسول بزاف ديال الناس لي تايكون الجواب ديالهم “الإله هو الوحيد لي يقدر يعاونك " .. و من تما تايبدأ مشوار البحث عن الإله و تايعتانق بزاف ديال الديانات .. الفيلم تايوضح كيفاش تانتعاملوا حنا مجتمعات العالم الثالث مع موضوع الدين و كيفاش تانغلّبوا سلطة رجال الدين على سلطة الاله نفسو ..
أما الفيلم الثالث و لي هو أحسن فيلم هندي تفرجت فيه لحد الساعة هو Like stars on earth لي تايحكي قصة واحد الطفل صغير ماتاتدخلش ليه القراية لراسو رغم المحاولات ديال الأساتذة و ديال الأسرة (وهذا حال بزاف ديال الوليدات ديالنا في المغرب) هاذشي غاذي يخلي العائلة ديالو “تتخلى” عليه و تصايفطوا لمدرسة داخلية (فين غادي يتحك و يتعلم بزز) بحجة أنه “ماباغيش” يقرا .. هاذ اللامبالاة و التهميش من طرف أقرب ناس ليه (عائلتو) غاذي يولد عند الدري بزاف ديال المشاكل النفسية لي غاذي تحولو من ذاك الطفل النشيط لطفل منعزل و خواف و عنيف شي مرات (تماما بحال وليداتنا في المدرسة العمومية) .. و لحسن الحظ تايجي واحد الأستاذ جديد للمدرسة لي غاذي يعرف المشاكل لي عندو و غايعاونو يتجاوز على هاذ النكبة ..
الفيلم واعر بزاف و عامر أحاسيس، بكيت و ضحكت و عاودت بكيت .. و تايخليني نسول راسي دائما : فين غاذين بوليداتنا مع هاذ التعليم لي ماتايحتارمش اختلافاتهم و ماتايراعيش مشاكلهم و ماتايخدمش على التميز لي فيهم ؟