كانتعذب بفيلم Burnout للخماري، فيلم يصيب بالغثيان من كثرة الردائة و الشح في الكتبة. من هاذ المنبر تاندعي الدولة تحبس الدعم على السينما المغربية و تخليها تموت ولا تضبر راسها,
التمثيل لا علاقة، و السبب هو الكتابة الشحيحة و خاصة الحوار، لي عمرني شفتو مقاد في شي فيلم مغربي لحد الساعة. تانتفرج و تانحس براسي بحال ايلا تانشوف شي مسرحية ديال الأطفال. بزاف ديال المشاهد لي تاتجيب التقية من رداءة حواراتها.
السينما ديال المغرب، فيها واحد العمق خاااااااوي. بزاف ديال المشاهد لي ماعندها تامعنى بداعي العمق. و المشكل هو مامصايباش مزيان. لا هي زوينة تفرج فيها و لا هي عندها شي معنى.
المخرجين في المغرب أغلبيتهم شادين السينما من المؤخرة ديالها. خلاو بزاف ديال البسيط السهل و غادين للعمق
الفليم عامر بالمشاهد الرديئة حواريا (جميع المشاهد). و بالمبالغة في التمثيل (أغلب مشاهد سارة بيرليس) و المشاهد لي ماعندها لا ساس لا راس (مشاهد الشطيح السريالية).
الروندا غادي في عا تا، حبس في عين الذياب و قال ليهم يالاه آ رباعة السيوروة اليوم غاتعوموا بالليل. علاش؟ كيفاش؟ سير سول الخماري. يا ربي را تانتعذب بهاذ ساعتين ديال التخربيق.
المهم السبب هو ان البطل أيوب يتلاقى مع البطل لاخر مول البورش (حيت الهو تايمشي لعين الذياب)
عاذشي تايضحك و تايبكي. CGI رديء و رخيص تايقتل بالضحك، علاش؟ بدون سبب واضح. غير من أجل العمق الخاوي. تانرجعوا عاوتاني لمعضلة العمق و التعالي ديال المخرجين المغاربة. لي خاص يترفع عليهم الدعم باش يحبس هاذ التخربيق و يرجعوا معانا للأرض.
عايدة طالبة الطب الداخلية جالسة في السبيطار ماعليها ما بيها جات عندها بنت من الزنقة (ما وقفهاش السوبر سيكيريتي لي تايكون في جميع السبيطارات المغربية) و قالت ليها ديري ليا اجهاض ولا نقتل راسي بتورنوفيس 😭 من الأطباء كاملين لي في السبيطار بجميع اختصاصاتهم البنت اختارت عايدة الطالبة
ناضت عايدة ضبرات على ماطيريال(لي أصلا ماكاينش في السبيطارات العمومية) بسرعة البرق، و دخلاتها للبلوك(لي أصلا ماشي متاح ديما) و دارت ليها عملية الإجهاض (لي ماعرفت فين تعلماتها) و بالعلالي (ماشافهم لا سيكيريتي لا ماجور لا مي فاطمة). البنت ناضت تاتدردك مافيها والو.
عايدة تاتمشي عند واحد السياسي تاتقصر معاه، هاذ السياسي عنوان الحملة ديالو هي ممنوع الاجهاض. و غادي يتعدى عليها و يغتاصبها حيت قالت ليه بنتك تقدر تكون تاتكمي بلا أخبارك (المشهد لي دار ضجة).
إيوا ديك البنت لي دارت الإجهاض قبيلة بنت هاذ السياسي. يا ربي تموت السينما المغربية 🤮
بلاتي، را بصح هاذشي يقدر يوقع في المخيلة ديال الكاتب دالفيلم و الأفلام ماشي بالضرورة تكون تاتهضر على الواقع و ماشي بالضرورة تكون لوجيك ديما.
و لكن را هاذشي بزااااف! مكتوب بأقل جهد ممكن و درجة التخلف لي فيه لا متناهية، و واخا تكون حمار غادي يديرونجيك هاذ التعربيز لي ماعندو اتجاه
عاوتاني تانقول بلي المشكل ماشي في أن هاذشي وقع و بهاذ الطريقة، و لكن تاتحس بالكتبة ماكايناش كّاع، و هاذ الخدمة الدراري الصغار يتخيلوا أحسن منها. حشمت نقول بأه كاينين أغلاط حيت الأغلاط بزاف على شنو وقع هنا. على الأقل الأغلاط تاتصلح. هاذشي خاص يتمحى للأبد من التاريخ دالسينما
بلاصة ماينزلوا هاذ المخرجين العميقين للأرض و يتعلموا يكتبوا (أو يختاروا و ينفذوا السيناريوات مقاد) تايشوفوا فينا بعين العمق من الفوق و يلوحوا لينا شي مشهد أو جوج سرياليين لي بزاف علينا نفهموهم حنا المغاربة المكلخين و السطحيين. و بقية الفيلم قطع لسق في المشاهد ديال جدريال.
الدعم خاصوا يترفع على السينما في المغرب. باش لي بغا يدير فيلم ينوض يشمر على كتافو و اما يصايب شي فيلم لي غادي يعجب الناس و فرقع الشبابيك (بحال 30 مليون و غيرهم) ولا يدير فيلم لي غايعجب النقاد و يميشي يتصاطح في المهرجانات العالمية.
أما بحال Burnout خاص ينقارضوا من السينما
فجأة الكوميييديا!!
محاولة فاشلة لحشو الكوميديا في هاذ الدراما! و عاوتاني تخربيق في التخربيق!
و عاوتاني محاسن الصدف غادي تلاقي جاد مع مراتو تاتوكل صاحبها الجديد! يا ربي هاذشي خاصو يحبس!
أكفس تجربة مشاهدة في التاريخ، علما أنني قصمت الفيلم على 4 المشاهدات باش مانموتش بالقرف
لي ماكنتش فاهم من الأول هو الهدف من الفيلم كامل هو البرهنة على نظرية النسبية الخاصة ديال أينشتاين. و بلي الزمن نسبي داخل و خارج سيارة جاد.
جاد تايقدر يضرب 20 ثانية في نص ساعة 😂😂
و أكيد ماغانتسناوش من فيلم ما فيهش البديهيات ديال السينما، يرد البال لتفاصيل بحال هاذو!
مخرج مغربي starter pack
- شخصيات لا علاقة مع المجتمع المغربي
- شخصية غريبة وماعندها تا شي دور في الفيلم من غير تبقى تقول العمق
- مشاهد عميقة و ماعندها تا معنى و تاعلاقة بالفيلم كل 15د
- نهاية مفتوحة باش يزيد يبان العمق
- بزاف ديال الغوات و الانفعالات باش يبان التمثيل ناضي
هاذ المشهد المجاني السبب الوحيد علاش تصول هو الفونطازم ديال الخماري، أما هو را ماتعني والو وماتايخدمش قصة الفيلم لي ماكايناش أصلا ههه.
الملخص 3 الأفلام في فيلم:
- جاد الكيليميني، تخلى على حلم باه و سمح في كولشي من أجل حلمو/هوسو القديم (يكون بطل فF1). غادي ياخد الفيلم كامل و هو تايترنح و يخربق الى أنه غادي يقدر يدير من المعاريف لعين الكورنيش في 3 دقائق. و غادي يدّعي الأمر أنه يتكّريسا و يبولو عليه باش يرجع لحياتو
- جاد الطفل السيرور اليتيم تايشوف أمه تاتعذب برجل واحدة و تايحاول بشتى الطرق باش يجيب ليها رجل اصطناعية. و في وسط هاذشي تايعاني مع تنمر صحابو السيرورا و مشاكل المدينة
- عايدة، طالبة دالطب البريئة لي تاتحول لبائعة هوى من بعد ماتاتورط في بريكول مع سياسي لي تصاب هو لي دارت ليه الاجهاض لبنتو. السياسي لي تايربح في الأخير و تايولي وزير الصحة و عايدة تاولي عاهرة.
الفيلم تايناقش لعيبات مريكّلين بحال السلطة، التناقض المجتمعي، الإغتصاب، البيدوفيليا، القوادة، أطفال الشوارع السيرورة، المشاكل الأسرية (Family dysfunction) و يقدر يكون تايناقش حتى مشاكل طلبة الطب الداخليين (مع الفلوس)
و لكن هاذشي بزاف باش يدخل في فيلم واحد!!!!
الخماري تايضرب بينا دورة في كازا زعما عبر 3 شخصيات من 3 الطبقات و تايعالج المشاكل ديال كل شخصية و تايورينا التطور لي تايعيشوه.
- جاد لي كان رافض الواقع ديالو، غادي يتقبلوا و يرجع ليه
- أيوب البريء، غادي يتخلى على برائتو و يشفر
- عايدة المناضلة، غادي تطوع و تخضع لواقع الدعارة
الفكرة زوينة و لكن التنفيذ رديء،
- الغلط الأكبر في نظري هو الخماري حاول يقول بزاف و صدق ما قايل والو في اللخر Less is More
- كان يركز على قصة واحدة و ينفذ مقاد
- الكتابة و الحوارات من أسوء ماكاين، و التمثيل زيدوا عليهم
- الفيلم مشتت و فيه بزاف ديال التخربيق و العمق المجاني
أخيرا الحاجة الوحيدة لي ممكن تغفر للفيلم هي النهاية ديالو، تمى فين تاتفهم بللي نوايا الكاتب. النية مزيانة و لكن التنفيذ رديء، فيلم صعيب تتفرج فيه من كثرة المشاكل لي تاتخليه غير قابل للفراجة. النية ماكافياش باش تصايب فيلم. الفيلم خاصو بزاف ديال الخدمة أكثر و من الأحسن يتنقص منو.