فكرة العدالة في الأنيمي
شي مرات تايكون واحد الموضوع طابو بالجهد و أنت باغي تهضر عليه و تخرجوا باش ما كان للعالم و لكن ماتقدرش .. و هنا فين تاتبان قيمة الفن.
الفن هو السبيل الوحيد للتعبير الحر، و السبيل باش تعبر على شي حوايج ماهما كانوا تايبانو طابوهات للعالم.
الأنيمي و المانغا ديال اليابان تاعكسوا هاذ الفطرة بزاف .. في الحرب العالمية الثانية اليابان مارسات بزاف ديال أنواع العنف الترهيب و البشاعة ضد الإنسانية و معاها ألمانيا و دول المحور كاملين . هاذ الحملة جات عادية و مافيهاش نقاش، واخا دور المحور ماشي بوحدهم لي ممكن نقولوا عليهم هاذشي و لكن جميع الدول لي شاركات في الحرب دارو جرائم كبيرة أو صغيرة في حق البشرية، و هاذ الجرائم ماتكتباتش أو ماتحكاتش حيت خرجوا رابحين من الحرب.
السؤال الكبير و العميق هو:
واش ممكن نبرروا جرائم اليابان في الحرب ؟ و واش كان عندهم شي سبب ؟
هاذ الموضوع كان و مازال طابو! و خاصة في أذهان اليابانيين بنفسهم و هاذشي لي تايبان واضح في المانغا اليابانية المشهورة.
المفهوم ديال العدالة عندو واحد البلاصة مهمة في المانغا اليابانية، أو على الأقل في شي أعمال مشهورة، و داشما ماتانشوفوه تايتعاود و دائما تايخربق لينا راسنا بأسئلة بحال:
- شناهي العدالة أصلا ؟ و واش ممكن نحققوها ؟ و واش ممكن نعرّفوها أصلا ؟
- شكون المسؤول على تثبيت مفهوم العدالة ؟ زعما عند من العدالة ؟ و شكون و شنو لي تايحكمها ؟
- واش العدالة مفهوم مطلق أولا كل واحد و عدالتو ؟
- ….
هاذ الأسئلة و محاولات الإجابة عليهم كانت باينة بزاف في 3 من الأنيميات لي شفت: Death Note و Attack on titans و Code Geass
جميع الأطراف ديال الصراع في Code Geass تاتسعى لتحقيق العدالة و تحويل العالم لعالم أفضل للجميع، و لكن لإختلاف كان في الطرق لي كان جاي من المبادئ ديال كل واحد فيهم.
مراحل تطور القصة
في Code Geass تانتبعوا واحد الشاب أريستوقراطي لي تايعيش مع أختو المعاقة و العمياء و الخادمة ديالو، و لي تايخطط لتغيير العالم لعالم أفضل لي هي شيء ما الحلم ديال أختو المعاقة.
القصة بدات بدوافع عاطفية للشخصية الرئيسية لي بغات تعرف حقيقة موت الأم ديالو و بأحلام بعيدة حول تغيير العالم لعالم أفضل. نهاية هاذ المرحلة كانت حصول لولوش على Geass لي خلاه يتحمس أكثر و يسرع من مخططاتو. هنا غادي تبدا مرحلة انتقالية، فيها لولزش تايكتاشف شنو ممكن يدير و تايجمع الأفكار ديالو من جديد.
المرحلة التانية غادي تبدأ من بعد الإتحال مع جيش الثوار الياباني، هنا غادي تتغطى الدوافع الأصلية بدوافع أخرى سياية خاصة، و غادي تتلف لولوش و حنا معاه على الدوافع الحقيقة. هاذ المرحلة كانت القلب ديال الأنيمي، و هي لي كانو فيها الأحداث و هي ليممكن نعتابروها فيها الفرجة للجمهور العام. كان غالب على هاذ المرحلة ألعاب الذكاء و شي ضد شي و التخطيط و الاستراتيجيات.
المرحلة الثانية غادي تسالي مباشرة مع بعد موت يوفيميا. الموت ديالها كان صدمة كبيرة للولوش و خلاه يرجع يفكر في السؤال المهم: علاش ؟؟ هنا تايرجع لولوش خطوات لور و كايتفكر بللي الهدف كان هو عالم أفضل و تايشوف كيفاش السلطة خلاتو يتلها عليه و تايشوف بلي مشى بعيد أبعد من ذاكشي لي كان تايتوقع و باغي. هاذ المرحلة العنوان ديالها هو الشك، خصوصا من بعد ماتايبدأ يتزادو المصائب و تايموتوا أشخاص قرابين ليه أو كايعرفوه شكون هو.
غادي تكمل الأمور هاكا حتى غادي تولي أختو نانالي مقيمة عامة ديال مقاطعة اليابان و غادي يدخل لولوش مرة أخرى لدوامة الشك حول الهدف علاش هاذشي تايديرو أصلا، و تايفقد الحماس في أنه يكمل في بزاف ديال اللحظات. هنا غادي يولي العدو ديال لولوش هو باه الامبراطور شارلز.
من بعد ماغادي يموت الإمبراطور و غادي تنوض الحرب، لي غادي تضطر فيها بريطانيا لاستعكال سلاح مدمر، لي غادي يقتل بزاف ديال الناس الأبرياء لي منهم نانالي. لولوش غادي تسالي مرحلة الشك عند لولوش و غادي يولي متؤكد من الهدف ديالو الجديد. و هنا فين غادي يتحالف مع سوزاكي الصديق/العدو ديالو و مع آخرين باش يطبقوا. لولوش من بعد مافقد بزاف ديال الناس قرابين ليه و عرف حقيقة موت الواليدة ديالو قرر يكمل حتى للنهاية باش يكفر على الذنوب ديالو كاملين و يحقق هدفو الأول لي هو عالم أفضل