أحسن Trailer في العام كلو!
هاذي هي الجائزة الوحيدة لي يستحق هاذ الفيلم هاذ العام، و بما أن هاذ الجائزة ماتاتعطاش .. فرقوها على العناصر لي خلات التريلر كان تحفة، و لي هوما الموسيقى لي تدارت في التريلر (ماشي هي لي داتها و لكن في نظري هي لي تستحق)، و الأداء ديال دانييل كالوياه (في التريلر ماشي في الفيلم)
الفيلم ركز بزاف على القضية و القيمة ديالها عند الأمريكيين السود و نسانا حنا المتفرجين، تاتحس بحال ايلا تايقول ليك المخرج و حتى الكاتب، ماشي سوقي تفرج و لا سير في حالك.
في نظري أكثر حاجة تاتعبر على الحاجة لي ماعجباتنيش في هاذ الفيلم هي الترشيح ديال 2 ممثلين في تصنيف أحسن ممثل في دور مساعد. وهاذشي لي تايبين أنه ماكاينش ممثل رئيسي في الفيلم، الفيلم ماتيهضر على تاواحد، من أكثر الأفلام المسطحة لي شفت من شحال هاذي. ما ان تاتبدأ تتفرج تاتاتلف أو تاتمل. ماتاتعرفش معامن خاصك تتعاطف و معامن خاصك توقف. الشخصيات كاملين مهمين و مثيرين للاهتمام و لكن ولا واحدة تعمق فيها الكاتب و عيشنا معاها، جميع الشخصيات سطحية، ماعرفناهم باش تايحسوا و لا علاش تايحسوا و لا شنوا باغين و كيفاش باغين ذاكشي. و شي مرات ختى تايبدأ المخرج يدخلنا في العالم ديال شي شخصية، و تاينقز منها و يمشي لحاجة أخرى.
تانحس بحال ايلا المخرج و الكاتب بغى يورينا بزاف ديال الحاجات و صدق ما ورننا تا لعبة. فيلم وثائقي لا غير.
كنت نبغي نعرف التاريخ ديال بيل و علاش هة داير هاكاك، و لا التاريخ ديال فريد و شنو الدرافع ديالو و لاش باغي يوصل. ولا نشوف طبيعة العلاقة لي تبنات بين بيل و فريد، ولا بين فريد و صاحيتو/مرتو، و لا نشوف أكثر النظال و التمرد ديال Black panther و طبيعة العلاقة لي كانت بينهم وبين الفصائل الأخرى، و التضاد لي كاين بيناتهم و الأفكار ديال كل واحدين و التوجه ديالهم. ولا المعاناة ديال فريد في شي مرحلة من مراحل حياتو و لا المعاناة ديال بيل في المحاولة ديالو يلبس جوج وجوه و الصراع الداخلي لي كان عايشوا (و لي خلاه ينتحر في آخر حياتو) . ولا بزاف ديال الحوايج.
ربما الوقائع مهمين للأمريكان السود ولا الناس لي تاريخهم هذا، و لكن بالنسبة للمتفرج العادي ماسوقوش في الوقائع، و ايلا بغيتي تغلبوا و توقفوا في جنبك و تقنعوا بالرسالة ديالك، خاصك تدير مجهود باش تجروا لعندك و تخليه مشدود قدام الشاشة.
من الحاجات لي زوينين في الفيلم، كان الأداءات التمثيلية، لي منهم دانيال كالوياه و لاكيث أونيل(الأفضل بالنسبة لي) و جيسي بليمونس لي تا هو دار دور زوين واخا بان غير شوية و عموما كلشي مثل مزيان.
حاجة أخرى هي التصوير و السينيماطوغرافيا و الموسيقى لي كانو رائعيين و بلا بيهم ماكنتش غادي نقدر نكمل الفيلم حتى.
آخر حاجة تتقال على هاذ الفيلم هو أنه، تيريت فيه بزاف حيت كانت التوقعات ديالي طاااااالعة بزاف من بعد الترييلير و تصدمت منين شفت هاذ النتيجة العادية