الأفلام الأجنبية دائما هي لي تاتأثر فيا حيت غالبا تاتحكي واقع قريب ليا
فيلم زوين، و عاوتاني فيلم بقصة مسطحة و لكن مختلفة شوية على لاخرين، في Judas كانو 2 شخصيات و حتى واحدة فيهم ما واخدة حقها و في Ma Rainey كانت 2 شخصيات و بجوحه عليهم التركيز و في Minari كان التركيز على عائلة كاملة ماشي غير 2 دالناس
ميناري فيلم زوين، فيها بزاف من الستيل ديال A24. خاصة الأفلام بحال The florida project و Lady Bird . الريثم طايح و حتى شي حاجة مثيرة في القصة.
الفيلم تايعاود القصة ديال عائلة كورية هاجرات من كورية باش تحسن ظروف العيش ديالها. و لقات راسها امام تحديات أصعب خاصة منين الأب تايهز عائلتو و تايمشيو يشريو أرض و كارافان في العروبية باش يبداو مزرعة و يقادو الحالة.
الفيلم بقدر ما هو ممل (أو غير مهم) بقدر ما عامر بالدروس و خاصة بالمواقف لي قرااابين بزاف ليا، و لي كانضن بزاف ديال الناس خاصة لي عايشين في المغرب غادي يحسوا بيهم و هاذو شي مواضيع لي تايهضر عليهم الفيلم
العلاقات الزوجية، كلما طالت كلما تاتصعاب، و واخا الحب والارتباط تايزيد شي مرات تاتصاطح مع الواقع و تايبدأ كل طرف تايقلب على شنو لي مسلكو في ديك العلاقة. و تايتبدلو الأولوييات .. واحدة من أفضل المشاهد لي شفت هاذ العام هو المشهد منين غادي تمشي العائلة تبيع الخضرة مع الأب جاكوب، و غادي يقادو الهمزة و في عز الفرجة و الانتشاء تاتضرب المرا مونيكا كولشي في الزيرو و تاعتارف لراجلها أنها مابقاتش تاتشوف العلاقة بيناتهم غادة لتا شي بلاصة أخرى
الراجل: هذا موضوع مهم لي تناول الفيلم. الراجل دائما عليه بزاف ديال الضغوطاتفي العالم و خاصة في المجتمعات لي مافيهاش بزاف ديال المساواة بين المرأة و الراجل, الفيلم تايهضر على هاذ القضية بزاف، و كيفاش الأب كان متحمل المسؤولية كاملة و حاط على راسو العبء ديال الاعتناء بالعائلة كاملة، و هاذشي لي خلاه يخدم 2 خدنات و يصهر ليل و نهار و باش حاجة خاصة يقدر يوفرها (لقطة الماء و البير و غيرهم) و هاذشي تايديرو الأب باش يبين بللي راه راجل و قادر على المسؤولية و يقددر يتكفك بكولشي مهما كانت الصعوبة, و باش يبين هاذشي و خاصة لولادو و للزوجة ديالو قرر يبدأ في المزرعة، و يبيع المحاصيل و يخدم ليل و نهار باش يدير هاذشي، و ههاذشي لي خلاه مايبقاش مسوق للعائلة ديالو و يولي أناني و تايعرف غير راسو و الهدف ديالو
من جهة أخرى كاينة الزوجة لي باغا تعيش حياة مستقرة فين يكبروا ولادها مزيان و تخلص الديون لي عليهم و يعيشوا هانيين، وواخا يكون هاذشي على حساب الشغف و الأهداف ديال راجلها, و واخا كانت تاتصبر عليه مرة مرة عمرها ما اقتانعات بذاكشي لي تايدير و عمرها مادعماتو ديال بالصح. دائما كانت تاتساوي معاه على قبل العائلة و صافي.
معا الوقت تزاد الفرق لي بينهم و مابقاوش قادرين يعيشوا مع بعضهم و قرروا يتفارقوا في المشهد الأسطوري.. و هاذشي لي بين مدى الهشاشة لي وصلات العلاقة ديالهم ليها ولا بالأحرى الكوما لي وصلات ليها و حبسات مابقاتش تاتحرك. فالأب من كترة الخدمة و الأم من كثرة الاهتمام ديالها بالعائلة و فكرة الاستقرار، كل واحد سدد عليه في قوقاعتو و ما بقاش قادر يتقبل الآخر.
و ايلا جينا نشوفوا غادي نلقاو عندهم نفس الهدف و من هاذ الهدف منين بداو و لكن بجوح غطاو ببزاف ديال الطبقات و مابقى عندو حتى معنى أصلا, و ولاو تايخدموا غير هاكاك بدون سبب و غير من أجل نفسهم الأنانية لي تاتبرر ذاكشي بللي را تايديروه من أجل العائلة