1: شكون لي قالك أن الكون ماتخلقش غير هاذي 5 دقائق ..
2: وا لكن را أنا عايش من شحال هاذي ماشي غير من هنا 5 دقائق ..
1: شكون قالها ليك ؟ شكون قالك أن حياتك مابدأتش غير من هنا 5 دقائق .. و شكون قالك أنك ماتخلقتيش بالعمر لي نتي عليه قبل دابا ب5 دقائق ؟
2: و لكن أن عشت قبل من دابا ب5 دقائق .. واش تاتقول أنني عشت شي فترة قبل مانكون كّاع ؟؟ و باش تاتفسر هاذ الخبشة لي في وجهي ؟؟
1: أنت تخلقتي قبل من دابا ب 5دقائق بوجه فيه ديك الخبشة .. و بذاكرة عامرة بالأحداث لي من المفترض درتي قبل هاذ 5 الدقائق (لي في الواقع مادرتيهش غير تاتوهم راسك أنك درتيه) ..
فيلم Moon واحد من أفضل الأفلام لي شفت في حياتي .. تايقارب هاذ الفكرة هاذي .. و تايبين أنها ممكن تكون ماشي غير ضرب من الخيال كيفما تاتبان ..
الفيلم عامر بزاف (Emotionally) و من الأفلام لي غاذي يضرك قلبك منين غاتتفرج فيه .. و لي غايخلي راسك مرون من بعد ماغاتتفرج فيه ..
الفيلم تايعاود على واحد رائد فضاء خدام في واحد المحطة طاقية في القمر، تايتسنى بفارغ العودة للأرض بعد 3 سنوات من العمل .. و واحد النهار و هو خارج بالمركبة ديالو من أجل العمل .. غاذي توقع ليه واحد الحادثة خطيرة .. و هنا فين غاذي يتقلب كولشي و غاذي يكتشف حوايج بزااف على راسو و على طبيعتو ..