العلاقة ديال بناد و الحيوانات مقلوبة
الOuverture لي تدارت على فكرة تربية المواشي رهيبة .. ماعرفتش واش كانت مقصودة و كاينة شي دلالة موراه أو لا، و لكن كانت الرمزية ديالها رائعة بزاف.
عكس الواقع لي تانلعبو فيه دور المتحكم و الراعي، الأنمي (و المانغا) جابت فكرة مغيرة و تاتحطنا في موضع الرعية كبشرية (أو على الأقل الابطال). و لهاذشي تايحطنا المانغاكا قدام مرايا معكوسة و تايزيرنا و يدفعنا نطرحوا الأسئلة:
- واش علاقتنا مع الحيوانات علاقة مفترس و فريسة،
- و ايلا لا واش النظام الجديد لي صايبنا لراسنا “نظام المزرعة” كافي باش نبررو استهلاكنا للحوم هاذ الحيوانات.
- و ايلا كان الهدف هو هو واش ايلا يدلنا القالب framework هاذشي تايخلي هاذشي أخلاقي.
المانغاكا تايحطنا في هاذ الجو بالعالم الرائع لي تخيلو. لي فيه واحد الكائنات قوية و شيطانية تاتاكل لحوم البشر، تاتصايب مزارع مختلفة في بلايص مختلفة. هاذ المزارع تاتمشي من ذات الجودة الرديئة لي تانتج بشر غير واعيين حتى، لمزارع ذات جودة عالية لي تاتكون على شكل دور أيتام تاتحرص على النمو ديال الأطفال بأحسن شكل ممكن جسمانيا و خاصة نفسيا و عاطفيا.
و هاذشي تماما لي تانشوفو في العالم ديالنا و لكن بشكل معكوس. مزارع ذات جودة عالية فيها أبقار و مواشي أخرى بصحة جيدة و في أوضاع زوينة، و مزارع إنتاجية لي ماتاتهتمش بالجودة بقدر ماتاتهتم بالإنتاجية في تايتم إرهاب الأبقار و تربيتهم بطرق وحشية. و نهاية بمختبرات إنتاج اللحوم بطريقة مخبرية من خلال الخلايا الجدعية.
هاذ المانغا تاتحطنى قدام مأزق أخلاقي كبير! تايتجاوز كيفاش الأبقار و المواشي تاتعامل في المزارع لقصف فكرة المزرعة بحد ذاتها.
عودة نورمان
واحد المسألة جوهرية في الدراما، و لي تعلمتها نع الوقت.
Characters are about investments
منين تاتبدأ تعاود القصة ديالك، و أي مساحة عطيتيها لشي شخصية من شخصياتك إستثمار، و كلما عطيتيها مساحة أكثر كلما تاتثقال أكثر و تايطلع الثمن ديال أنك تحيدها من القصة.
مثلا ايلا هضرنا على فيلم ديال الحرب، الجنود العاديين لي ماتايخدوش حيز كبير من القصة، تايكون ساهل تضحي بيهم في المعارك و تحيدهم أو حتى تبدلهم. و لكن بالعكس الجنود لي تاتحكي قصصهم و تاتعاود طموحاتهم و تاتغوص في أحاسيسهم تايولي صعيب تتخلص منهم بسهولة في القصة.
هاذشي من جهة و من جهة أخرى، إعادة إدماجهم في الصقة من بعد ماتاتحيدهم تايكون عندو ثمن أعلى بكثير من حتى الإستثمار لي جرتي في الأول كامل. هاذشي علاش في نظري أصعب حاجة ممكن تديرها مع شي شخصية هي تحيدها من القصة و تعاود ترجعها.
في The promised Neverland تانطيحو في هاذ اللعيبة، بحيث أن الكاتب تايستثمر بزاف في شخصية نورمان، و فجأة تايقرر يحيدها من القصة. في نظري كانت التحييدة مبررة إلى حد بعيد ماشي perfect ولكن كان البعد لي تزاد للقصة منين مشى (إنتقال المسؤولية لعاتق إيما و راي، و الوعد لي واعدوا بعضهم، و إستكمال خطة الهروب ….) كان يستحق.
آخر مشهد غادي نشوفو فيه نورمان كان غامض، و هاذشي لي خلاني تانتسنى الرجوع ديالو، و لكن مانرجحوش. حيت الاستثمار لي تدار في الإزالة ديالو كان كبير. و غادي يخاص بزاف ديال الخدمة و عصير الذماغ باش نقدرو نرجعوه للقصة بطريقة لائقة لي تكون أولا مبررة و ماتستفزش القارء و ثانيا تاتعادل الاستثمار اللولاني لي درنا باش نحيدوه