اليوم كان الماتش ديال الطاليان مع سويسرا، سويسرا عندها فرقة ناضية و لعبوا مزيان و لكن الطاليان خرجوا غالبين ب 3 ل 0 من أفضل النسخ ديال الطاليان لي شفت من 2006، كانت نسخة برانديلي في 2012 في يامات العز ديال اليوفي و وسط الميدان ديالها (بيرلو و ماركيزيو و حتى دي روسي من روما) و في عز تألق بالوتيلي و كانت نسخة كونتي لي أقل منها بزاف في جودة اللاعبين و أفضل منها كفريق و كلعب و تكتيك في نظري. ...
في نظري باش تربح الدوري خاصك 2 دالحاجات الفريق لأول و الدوام: خاصك تكون عنجك تشكيلة راسمية ثابتة فيها لعابة مقادين و تايلعبوا مزيان في أغلب الماتشات. و ماخاصش يكون الشك أو شي بوسط مامعروفش شكون تايلعب فيه. الفريق الثاني يقضي الغرض: غادي يخاصك لعابة في التوش لي ممكن يقضيو الغرض، إيلا حتاجيتي تبدل شي لاعب أو ايلا تضرب شي حد. هنا تايخاض يكون عندك لعابة لي ممكن يعوضوا أغلب اللعابة دبال الفريق الأول، و ضروري يكونوا عندك على الأقل شي 3 اللعابة للي تقريبا بالجودة ديال الفريق الأول و اللي ممكن تدخلهم في أي لحظة يقلبوا الماتش ...
اليوم كان نهائي اليوروبا ليغ 2020 .. بمواجهة الانتر ديال كونتي مع اشبيلية ديال لوبيتيجي .. الماتش سالا ب 3-2 لاشبيلية هاذو شي لعيبات زوينين و خايبين على الماتش: الخايبين وسط الميدان خاوي، خاصة عند الانتر، ال 5-3-2 ديال كونتي تاتخلي واحد الفراغ كبير بين الثلاثة ديال وسط الميدان و الجوج لي لقدام. هاذشي علاش تايخاص لعابة ديال الوسط ميدان عندهم work rates طالعين و في نفس الوقت خاص يكونوا تقنيا مزيانين و يقدرو يوصّلو الكورة للقدام. و هاذشي لي ماكاينش في الانتر خاصة الجزء الثاني. التحكيم كان صعيب شوية على الانتر، خاصة من بعد ما عطاش الحمرا لدييغو كارلوس و عاد بزاف ديال الكوفرات لاشبيلة ماكاينينش. الزوينين جوج لعابة هازين الراية المغربية في البوديوم و واحد هاز الراية ديال الأمازيغ. بونو جبد كورة للوكاكو راسو راس بارّة. خيسوس نافاس أسطورة إشبيلية، من بعد سنين برّا، رجع لفريقو الأول و بدل البوسط ديالو و تايعاود يصنع معاهم التاريخ. الضغط لي كان على نافاس و على لوبوتيجي رهييب، و بان بزاف منين سالا الماتش، البكا لي بكاو تاتحس بيهم كان عليهم ضغط رهيب و تحيد منين داوها. نافاس حيت عميد و فرقتو القديمة هاذي و خاص يهزهم، و هزهم على كتافو. و لوبيتيجي أول لقب من بعد الانتكاسة ديال الريال من بعد الفضيحة ديال المنتخب. دييغو كارلوس بطل المبارات مع بانيغا و الأسطورة خيسوس. أخيرا مونتشي و كيفاش هبط احتفل مع اللعابة و حيح في التيران.
سالا الفينال ب 1-0 للبايرن ضد بي إس جي .. الماتش كان شوية ممل و تكتيكي في الميطا اللولة و تحرك شوية في الميطا الثانية خاصة من بعد البيت ديال كومان. هاذو شي لعيبات زوينين و خايبين البايرن دات الكأس و هي رابجة جميع الماتشات هههه .. أول مرة تطرا هاذ اللعيبة. تياغو أسطورة، دار كولشي في الماتش، حيح ! و لي زايد في هاذ الماتش هو أنه ماتفلسفش بزاف لعب الساهلة بلا زيادة. كيميتش ماكينة ! بزاف هاذ اللاعب و من أحسن لعابة في الماتش، عطى البيت و ديزاكتيفا مبابي. دفاعيا و هجوميا واعر و تقنيا حرايفي و تايتقاتل في التيران. مولر أهم لاعب في بايرن واقيلا، و ليفاندوفيكي دار ماتش زوين واخا ماماركاش. آآه غوريتسكا ناضي، من أجمل اللعابة لي شفت، تايلعب لعب سامبل و اتاغلطش بزاف و تايتحرك في التيران كامل، و مافيهش الزواق بزاف و اللعب المريض. من اللخر مرجّل. بواطنغ و سولي لاباس عليهم، ماشي أحسن مدافعين في العالم و لكن قاضيين غرض. و لكن ألابا في نيفو آخر، من بعد سنين كظهير تايتحول لقلب دفاع و تايدير ماتشات واعرين، خاصة بالخروج بالكرة من اللور و الباسات و حتى التمركز. على ليسر، ألفونزو دافيس ناضي و حركي و تايداف مزيان من الفوق. أخيرا العميد و السوبرمان مانوييل نوير .. جبد اليوم ي كواري انفرادات لنيمار و مبابي, و خاصة هاذيك لي كان فيها مبابي تسلل و هاكاك جبده و دار حل يديه باش يقول ليهم ,, الخرا لا ماركيتو واخا تكونو تسلل، و يفكر العالب بالي راه أحسن حارس في العالم. بالنسبة لباريس، توخيل دخل ساد التيران من الوسط و خانق اللعب، بال 4-3-3 ديالو لي تاتشبه ل 5-2-3 .. و في الجناب عطى تعليمات لباريديس و هيريرا باش يرجعوا يعاونو، و حتى مبابي و ديماريا شي مرات. هاذشي لي خلى الشوط اللول مزير و صعيب شوية على الفراقي بجوج. و خلانا نتفرجوا في ماتش مسدود. ...